Sý dıplomatııasyn kúsheıtýdi qolǵa alýymyz kerek — Prezıdent
ASTANA. KAZINFORM — Qazaqstan sý resýrstaryn ratsıonaldy, ádil ári teń quqyly negizde paıdalaný qajet degen ustanymdy jaqtaıdy. Bul týraly Aqordada sý sharýashylyǵy qyzmetkerlerin memlekettik nagradalarmen marapattaý rásiminde Memleket basshysy Qasym-Jomart Toqaev aıtty.
— Sý qaýipsizdigi máselesi Qazaqstannyń ornyqty damýyna áser etetin negizgi shartqa aınaldy. Biz osy sebepti sý dıplomatııasyn kúsheıtýdi qolǵa alýymyz kerek. Atalǵan asa mańyzdy iske kadrlardy daıarlap, irikteýimiz qajet. Eń aldymen, transshekaralyq ózender basseınindegi sýdy tıimdi paıdalaný júıesin jolǵa qoıý úshin kórshiles memlekettermen yqpaldastyqqa mán bergen jón. Qazaqstan sý resýrstaryn ratsıonaldy, ádil ári teń quqyly negizde paıdalaný qajet degen ustanymdy jaqtaıdy. Sondaı-aq sý qaýipsizdigi men tutas aımaqtyń turaqtylyǵyn qamtamasyz etý maqsatynda ózara mindettemelerdi saqtaǵan durys, — dedi Qasym-Jomart Toqaev.
Prezıdent kórshiles eldermen konstrýktıvti dıalog jáne taraptardyń múddesine saı yntymaqtastyq jalǵasady dep úmittenetindigimizdi aıtty.
— Qazaqstan Ortalyq Azııa elderiniń sý-energetıka konsortsıýmyn qurý bastamasyn dáıekti túrde ilgeriletip keledi. Óńir elderimen tyǵyz yqpaldastyqtyń arqasynda byltyr dıqandarymyzǵa qajetti sý tolyq jetkizildi. Bıyl da osyndaı jumys atqarylýǵa tıis. Álemde sýǵa suranys deńgeıi 2040 jylǵa qaraı 40 paıyzǵa artýy múmkin. Mundaı jaǵdaıda búkil halyqaralyq qoǵamdastyqtyń kúsh-jigerin biriktirý mańyzdy. Sondyqtan Qazaqstan sý daǵdarysyn eńserýdi kózdeıtin kópjaqty bastamalarǵa belsendi qatysady. Byltyr Saýd Arabııasynda ótken arnaýly sammıtte sý problematıkasyn sheshýdiń negizgi tásilderimen bólistim. Kelesi jyly elimizde BUU aıasyndaǵy Óńirlik ekologııa sammıtin ótkizý josparlanyp otyr. Osy tektes qadamdar elimizdiń sý qaýipsizdigin nyǵaıtýǵa septigin tıgizedi, — dedi Memleket basshysy.
Aıta keteıik, 9 shilde Qazaqstanda sý sharýashylyǵy qyzmetkerleriniń kásibı merekesi atalyp ótedi.
«Jumysshy mamandyqtarynyń jyly» aıasynda sý sharýashylyǵy salasyna mamandardyń jańa býynyn daıarlaý bastalǵan bolatyn.