Sýdyń qaıtýyna baılanysty Petropavlǵa kireberis avtojoldan shekteý alyndy

PETROPAVL. KAZINFORM – «Jezqazǵan-Petropavl» respýblıkalyq avtojolynyń Petropavl men Beskól aýyly arasyndaǵy ýchaskesinen kóliktiń barlyq túrine shekteý alynyp tastaldy. Joldy basqan sý deńgeıi túsip, jeńil kólik qıyndyqsyz ótetin jaǵdaıǵa jetti.

«Qazavtojol» UK» AQ Soltústik Qazaqstan oblystyq fılıaly baspasóz qyzmetiniń málimetinshe, 14 sáýir kúni «Jezqazǵan-Petropavl» A-16 respýblıkalyq avtojolynyń 954 km, ıaǵnı «ıÝjnyı» baqylaý-ótkizý beketiniń janyn sý basty. Sondaı-aq «Petropavl aınalma joly» R-49 avtojolynyń 12-13 km de Jumysshy kentine deıin sý astynda qaldy. Sý basqan ýchaskeniń eni 500-600 metrge jetse, tereńdigi 1 metrge deıin bardy. Sol sebepti bul joldy ýaqytsha jabý týraly sheshim qabyldandy.

Qazirgi ýaqytta sý deńgeıi tómendep jatyr. «ıÝjnyı» beketiniń janynda sý basqan ýchaske aýmaǵy 300 metr shamasynda, tereńdigi – 20 sm. Jumysshy kenti mańynda sý 100 metr jerdi shaıǵan, tereńdigi 15-20 sm aspaıdy. Sondyqtan saǵat 17.00-den bastap bul ýchaskelerden shekteý alynyp tastaldy.

Buǵan deıin Petropavlda tasqynnan zardap shekkenderdiń kommýnaldyq aqydan bosatylǵanyn jazǵan edik.