Sýdyń «qara naryǵyn» joıý jónindegi jol kartasy qabyldandy
ASTANA. KAZINFORM — Búgin Úkimet otyrysynda Sý resýrstary jáne ırrıgatsııa mınıstri Nurjan Nurjigitov jańadan salynatyn sý qoımalary jaıynda baıandady.
— Túrkistan oblysynda Qaraqýys jáne Báıdibek-ata sý qoımalarynyń qurylysy jalǵasyp jatyr, olardy 2026 jyly aıaqtaý josparlanǵan, bul shamamen 69 mln tekshe metr qosymsha sý jınaýǵa múmkindik beredi. Islam damý banki qaryzynyń birinshi transhy qarajaty esebinen 2026 jyly úsh jańa sý qoımasynyń qurylysy bastalyp, eki sý qoımasyn rekonstrýktsııalaý kózdelgen. Bir mezgilde ońtústiktiń 5 oblysynda jalpy uzyndyǵy 986 km bolatyn 103 kanaldy rekonstrýktsııalaý men avtomattandyrý boıynsha 96 jobany iske asyrý bastalady, — dedi Nurjan Nurjigitov.
Onyń aıtýynsha, qalyptasqan jaǵdaıda sý únemdeý tehnologııalaryn belsendi túrde engizý jáne ylǵaldy kóp qajet etetin daqyldardyń egis alqaptaryn qysqartý qajettiligi týyndap otyr.
— Sonymen qatar Memleket basshysynyń Qazaqstan halqyna Joldaýyn iske asyrý jónindegi Jalpyulttyq jospar aıasynda mınıstrlik Bas prokýratýramen birlesip sýdyń «qara naryǵyn» joıý jónindegi Jol kartasyn qabyldady. Jol kartasy aıasynda mınıstrliktiń quqyq qorǵaý jáne basqa da memlekettik organdarmen ózara is-qımyly kózdelgen. Sýdyń «qara naryǵynyń» táýekel aımaqtary aıqyndalyp, sý paıdalanýshy men sý tutynýshy arasyndaǵy sharttyq qatynastardy tsıfrlandyrý bastaldy, tsıfrlyq jáne spýtnıktik monıtorıng quraldary engizilip jatyr. 2026 jyly sýdyń «qara naryǵynyń» aldyn alýǵa, sondaı-aq sý obektilerinde, sý qorǵaý aımaqtary men beldeýlerinde zań buzýshylyqty boldyrmaýǵa baǵyttalǵan baqylaý jáne ınspektsııalyq is-sharalardy kúsheıtý josparlanǵan. Jol kartasynda tsıfrlandyrýǵa erekshe mán berilgen. Osy jyldyń basynan mınıstrlik fermerlermen sý berý jónindegi sharttardy elektrondyq formatta jasasýǵa kóshý jumystary júzege asyrylyp jatyr. Atalǵan júıe agrarshylardy sýmen qamtamasyz etýdiń tolyq tsıklin qamtıdy, — dedi mınıstr.
Júıeni engizý derekterdegi aıyrmashylyqtardy boldyrmaýǵa, ákimshilik úderisterdi ońtaılandyrýǵa, adamı faktordyń áserin barynsha azaıtýǵa, sondaı-aq sý resýrstaryn bólý men sý paıdalanǵany úshin esep aıyrysýdyń obektıvtiligin qamtamasyz etýge múmkindik beredi. Qazirgi ýaqytta júıe shtattyq rejımde jumys istep tur. Sý tutynýshylarmen sharttar jasasý jumystary jalǵasyp jatyr.
Budan buryn habarlanǵandaı, búgin Úkimet otyrysynda Sý resýrstary jáne ırrıgatsııa mınıstri Nurjan Nurjigitov ózen basseınderindegi sý mólsherine túsinik berdi.