Sýdy josyqsyz paıdalanatyndardyń derekter bazasy jasaqtalady — Bektenov
ASTANA. KAZINFORM — QR Sý resýrstary jáne ırrıgatsııa mınıstrligi jerasty sýlaryn qoldaný salasynda zań oryndalýyn qamtamasyz etý maqsatynda júıeli jumys atqaryp jatyr. Bul jóninde QR Premer-mınıstri Oljas Bektenov depýtattyq saýalǵa joldaǵan jaýabynda málimdedi.
Onyń sózinshe, bıyl aqpan aıynda sýdy zańsyz satý men satyp alýdyń jolyn kesý boıynsha sharalar qabyldaýǵa arnalǵan jol kartasy bekitildi.
— Jol kartasyna saı, analıtıkalyq jumys bastaldy. Onyń aıasynda óńirler men ekonomıka salalaryndaǵy sý teńgerimi taldanady, sýdy zańsyz tutynýy múmkin toptar anyqtalady, berilgen esepter tekseriledi. Sondaı-aq sektordyń esepteý qurylǵylarymen qamtylý kórsetkishi, sý sharýashylyǵynda qoldanylatyn qurylystardyń jaǵdaıy, sý ınspektsııalarynyń baqylaý deńgeıi taldanady. Budan bólek sýdy josyqsyz paıdalanatyndardyń derekter bazasy jasaqtalady. Zańbuzýshylyqtar tirkelgen saıyn sol bazaǵa engizilip otyrady, — delingen O. Bektenovtiń jaýabynda.
Jol kartasynda tsıfrlandyrýǵa erekshe nazar aýdarylǵan. Máselen, Sý resýrstary jáne ırrıgatsııa mınıstrligi biryńǵaı tsıfrlyq platforma ázirlep jatyr. Sonyń arqasynda aldaǵy ýaqytta kelisimsharttar onlaın jasalady jáne basqa da protsester avtomattandyrylady.
Sonymen qatar basseındik sý ınspektsııalary baqylaýdy kúsheıtip, mamandar sýdy paıdalanýshylarǵa túsindirý jumystaryn júıeli túrde júrgizip keledi.
Aıta keteıik buǵan deıin Senatta jerasty sý resýrstaryn tıimdi paıdalaný máselesi kóterilgenin jazǵanbyz.
Sonymen birge basseındik sý ınspektsııalary qandaı ókilettikterge ıe ekenin habarlaǵanbyz.
