«Sýdy únemde - bolashaqty saqta!»: Qazaqstan stýdentteri ekosaǵatqa qatysty
ASTANA. KAZINFORM – L.N.Gýmılev atyndaǵy Eýrazııa ulttyq ýnıversıtetinde «Sýdy únemde - bolashaqty saqta!» taqyrybynda ekologııalyq saǵat ótti. Іs-sharany Sý resýrstary jáne ırrıgatsııa mınıstrligi Ǵylym jáne joǵary bilim mınıstrligimen birlesip uıymdastyrdy.
Іs-sharaǵa Sý resýrstary jáne ırrıgatsııa mınıstri Nurjan Nurjigitov, Parlament Senatynyń depýtaty Bekbolat Orynbekov, EUÝ Dırektorlar keńesiniń tóraǵasy Darhan Myńbaı jáne ýnıversıtettiń 500-den astam stýdenti qatysty. Sonymen qatar ekosaǵatqa onlaın formatta Qazaqstannyń barlyq óńirindegi joǵary oqý oryndarynan 2000-nan astam stýdent qosyldy.
Qonaqtar stýdentterge byltyr qabyldanǵan Sý kodeksindegi jańashyldyqtar, ekonomıka salalarynda sýdy únemdeýdi qamtamasyz etý boıynsha atqarylyp jatqan jumystar men olardyń nátıjeleri, turmystyq jaǵdaıda sýdy únemdeý tásilderi, sondaı-aq Soltústik Araldy saqtaý, sý sharýashylyǵy ınfraqurylymyn damytý jáne jerasty sýyn ıgerý baǵytyndaǵy jobalar týraly aıtyp berdi.
– Memleket basshysy atap ótkendeı, sý resýrstaryn tıimdi ári uqypty paıdalaný - eldiń ornyqty damýynyń negizgi basymdyqtarynyń biri. Bolashaqta jas mamandar sý resýrstaryn tıimdi basqarý, jańa tehnologııalardy engizý jáne ekologııalyq mádenıetti qalyptastyrý isinde aıryqsha ról atqarady. Sondyqtan sizderdiń bilimderińiz ben jańa ıdeıalaryńyz Qazaqstannyń sý qaýipsizdigin qamtamasyz etýge úlken úles qosa alady. Sýdy únemdeý - barshamyzǵa ortaq mindet. Kúndelikti ómirdegi tipti shaǵyn áreketterdiń ózi úlken nátıjege jetkizedi. Tek birlesken kúsh-jigerdiń arqasynda ǵana biz elimizdiń sý resýrstaryn saqtap, ony keler urpaqqa aman jetkize alamyz, - dedi Sý resýrstary jáne ırrıgatsııa mınıstri Nurjan Nurjigitov.
Budan keıin ashyq pikirtalas ótip, onyń barysynda qonaqtar stýdentterdi qyzyqtyrǵan suraqtarǵa jaýap berdi. Sondaı-aq ekosaǵat aıasynda Eýrazııa ulttyq ýnıversıteti stýdentteriniń, oqytýshylary men jas ǵalymdarynyń úzdik zertteý jumystary men jobalary tanystyryldy.
«Sýdy únemde - bolashaqty saqta!» bilim berý jobasyn 2025 jyldyń basynan beri Sý resýrstary jáne ırrıgatsııa mınıstrliginiń «Aqparattyq-taldaý sý resýrstary ortalyǵy» KEAQ halyqaralyq uıymdar men seriktesterdiń qoldaýymen júzege asyryp keledi. Bastama Qazaqstanda sýdy tıimdi tutyný mádenıetin ilgeriletýge baǵyttalǵan.
Aıta keteıik, Oralda quny 21,6 mlrd teńge bolatyn sý ınfraqurylymy jobalary iske asyp jatyr.
