Sýdy tıimdi paıdalaný: fermerlerge arnalǵan sýbsıdııalar kólemi artty
ASTANA.KAZINFORM – 2025 jyly elimizde sý únemdeý tehnologııalary 100 myń gektarǵa jýyq aýmaqta engizildi. Onyń ishinde ońtústik óńirlerdegi jańa aýmaqtardyń kólemi shamamen 91,5 myń gektardy quraıdy. Bul týraly QR SRIM Sý únemdeý tehnologııalaryn damytý departamentiniń dırektory Berikbol Mándibaev habarlady.
Onyń aıtýynsha, sý únemdeý tehnologııalaryn qoldaný aıasyn keńeıtý boıynsha júıeli jumystar júrgizilip jatyr. Atap aıtqanda, fermerler úshin ınfraqurylym júrgizý kezinde uńǵymalardy burǵylaýǵa, sondaı-aq sý únemdeý tehnologııalaryn satyp alýǵa jáne ornatýǵa jumsalǵan shyǵyndardy óteý úlesi 50 paıyzdan 80 paıyzǵa deıin arttyrylǵan.
Sonymen qatar, sý tarıfiniń qunyna baılanysty sýarý sýbsıdııalaryna saralanǵan mólsherleme engizildi.
– Máselen, sý únemdeý tehnologııalaryn qoldanatyn fermerler úshin sýbsıdııa mólsheri 60 paıyzdan 85 paıyzǵa deıin ulǵaısa. Al mundaı tehnologııalardy paıdalanbaıtyn sharýalar úshin sýbsıdııalaý deńgeıi 2024 jyly 50-75 paıyz aralyǵynda bolsa, 2026 jyldan bastap 30-55 paıyzǵa deıin tómendeıdi. ıAǵnı, sýdy paıdalaný kezinde sýdy únemdeý tehnologııalaryn oldanǵan sharýlar úshin sýbsıdııa mólsheri bir qalypta qalsa, tehnologııany qoldanbaǵandarǵa arnalǵan qoldaý kólemi jyl saıyn azaıady, – dedi Berikbol Mándibaev.
Sala ókili atap ótkendeı, sý únemdeýdiń taǵy bir tetigi – lazerlik josparlaý tehnologııasy. Bul baǵytta da jeńildik jasalyp, jabdyqtyń bir birligine eń tómengi normatıv talaby alynyp tastaldy.
– Lazerlik josparlaý sýdyń egis alqaby boıynsha birkelki taralýyn qamtamasyz etedi. Bul – sý basý men qurǵaq aımaqtardyń aldyn alýǵa sep. Sonyń nátıjesinde sýarýǵa qajetti sý kólemi azaıyp, sý 20 paıyzǵa deıin únemdeledi. Bul ásirese qurǵaqshylyq jıi bolatyn óńirler úshin ózekti. Atalǵan tehnologııa elimizdiń kúrish alqaptarynda belsendi qoldanylady, – dedi departament dırektory.
Aıta keteıik buǵan deıin elimizde egistikti sý únemdeý tehnologııalarymen sýarýǵa bólinetin sýbsıdııalar sany artyp keletinin jazǵanbyz.