Sýdy kóp tutynatyn bıznester qandaı tarıfpen tólem jasaıdy
ASTANA. KAZINFORM – «Astana sý arnasy» memlekettik kommýnaldyq kásiporny sýmen jabdyqtaý jáne sý burý qyzmetteriniń tarıfteriniń nelikten ózgergenin jáne sýdy kóp tutynatyn bıznes sýbektileriniń qandaı tarıfpen tólem jasaıtynyn túsindirdi.
Sý arnasynyń habarlaýynsha, tarıfter ózgerisiniń negizgi sebepteri – jańadan iske qosylǵan nysandar men qurylystardy ustaýǵa ketetin paıdalaný shyǵyndarynyń artýy, sondaı-aq «Astana sý arnasy» ShJQ MKK úshin strategııalyq taýar bolyp sanalatyn elektr energııasy baǵasynyń ósýi bolyp otyr. Sebebi tazartý men aǵyn sýlardy aıdaý nysandaryndaǵy barlyq jabdyq elektr qýatymen jumys isteıdi.
Sonymen qatar, nysandardyń tozýyn jáne apattyń jaı-kúıin azaıtý maqsatynda olardy jańartý, jańǵyrtý jáne tehnıkalyq qaıta jaraqtandyrýǵa qosymsha ınvestıtsııalar qajet.
− 2025 jyldyń qańtarynan bastap turǵyndar úshin aýyzsýmen jabdyqtaý qyzmetine sýdy tutyný kólemine baılanysty dıfferentsıaldy tarıfter engizildi. Bul tarıfter 4 shaǵyn topqa bólinedi. Eń tómengi tarıf – 105 teńge/m³, adam basyna aıyna 3 tekshe metrge deıin tutynatyn abonentterge arnalǵan.
Al eń joǵarǵy tarıf – 211 teńge/m³, adam basyna 10 tekshe metrden astam sý tutynatyn abonentterge qoldanylady, − dep jazylǵan kásiporyn jaýabynda.
QR Ulttyq ekonomıka mınıstrliginiń «Tarıfterdi qalyptastyrý qaǵıdalaryn bekitý týraly» buıryǵyna sáıkes, sý tutyný kólemine qaraı saralanǵan tarıfter tek turǵyndar úshin belgilengen.
Al kásipkerler pen bıznes sýbektilerine, memlekettik organdar men basqa da zańdy tulǵalarǵa saralanǵan tarıfter zańnamada qarastyrylmaǵan.
Qazirgi ýaqytta kólik jýý, kilem jýý sekildi nysandarda QQS-ty esepke almaǵanda 401 teńge mólsherindegi zańdy tulǵalarǵa arnalǵan bekitilgen tarıf qoldanylady.
Sýdy únemdeý maqsatynda mundaı nysandarda sý aınalymy júıeleri ornatylady.
− Barlyq kásipkerlik sýbektileri, zańdy tulǵalar men memlekettik organdar úshin aýyzsýmen qamtý boıynsha 401 teńge mólsherinde biryńǵaı tarıf belgilengen. Tólem sý eseptegish quraldaryna sáıkes naqty tutyný kólemi boıynsha júrgiziledi, − dep túsindirdi Astana sý arnasy.
Buǵan deıin Astana ákimi Jeńis Qasymbek qalada sarqyndy sý men elektr tarıfiniń qymbattaýyna baılanysty pikir bildirgen edi.