Sýdannyń Kordofan óńirinde dronnyń shabýylynan 104 beıbit turǵyn qaza tapty

ASTANA. KAZINFORM – Sýdannyń Kordofan óńirinde 4 jeltoqsannan beri jasalǵan ushqyshsyz ushý apparattarynyń (drondardyń) shabýyldary saldarynan keminde 104 beıbit turǵyn kóz jumdy. Bul týraly seısenbi kúni BUU-nyń Adam quqyqtary jónindegi joǵarǵy komıssary Folker Tıýrk málimdedi, dep jazdy Sınhýa.

Onyń aıtýynsha, oqıǵalanyń birinde drondar Kalogı qalasyndaǵy (Ońtústik Kordofan) balabaqsha men aýrýhanaǵa soqqy jasap, saldarynan keminde 89 beıbit turǵyn qaza tapqan. Qurbandardyń arasynda 8 áıel men 43 bala bar.

Folker Tıýrk Sýdanda qarsylas toptar arasyndaǵy qaqtyǵystardyń ýshyǵýyna qatty alańdaýshylyq bildirip, janjaldasýshy barlyq tarapty, sondaı-aq yqpaldy memleketterdi dereý atysty toqtatýǵa jáne odan ári qylmystardyń aldyn alýǵa shaqyrdy.

Sonymen qatar ol senbi kúni Kadýglı qalasyndaǵy (Ońtústik Kordofan) BUU bazasyna jasalǵan dron shabýyly kezinde alty bitimgerdiń qaza tabýyn qatań aıyptady. Joǵarǵy komıssardyń aıtýynsha, beıbitshilik mıssııasy qyzmetkerlerine jasalǵan shabýyldar soǵys qylmysyna teńestirilýi múmkin.

Budan bólek, jeksenbi kúni Dıllıng qalasyndaǵy (Ońtústik Kordofan) aýrýhanaǵa dron soqqysy jasalyp, keminde 6 adam qaza tapty, taǵy 12 adam jaralanǵan, olardyń arasynda medıtsına qyzmetkerleri de bar. Folker Tıýrk medıtsınalyq mekemeler men medıtsına qyzmetkerleri halyqaralyq gýmanıtarlyq quqyqpen qorǵalatynyn atap ótti.

Eske sala keteıik, buǵan deıin BUU Sýdandaǵy zorlyq-zombylyqty toqtatýǵa shaqyrǵan edi.