Sýdandyq kóterilisshiler AQSh-tyń ótinishi boıynsha gýmanıtarlyq bitimge kelisti
ASTANA. KAZINFORM — Sýdan terrıtorııasynyń jartysyn baqylaıtyn jedel aralasý kúshteri AQSh pen bir top arab elderiniń ótinishi boıynsha ýaqytsha atysty toqtatýǵa kelisti. Sýdan bıligi bul usynysty áli qabyldaǵan joq, dep habarlaıdy VVS.
Sýdan armııasy men onyń jergilikti odaqtastary batysyndaǵy Darfýr aımaǵyndaǵy sońǵy qala strategııalyq El-Fasher qalasyn basyp alǵannan keıin kóp uzamaı gýmanıtarlyq bitim jarııalady.
BUU-nyń ótinishterine qaramastan, gýmanıtarlyq kómek 18 aı boıy qorshaý kezinde El-Fasherge kirýge tyıym salyndy. Birikken Ulttar Uıymynyń qoldaýymen qurylǵan baqylaý toby qalada asharshylyq bastalǵanyn rastady.
El-Fasherdi basyp alǵannan keıin, áskerı top qalada turǵyndardy jappaı óltirdi degen kóptegen habarlamalar paıda boldy. Alaıda top bul aıyptaýlardy joqqa shyǵardy. Biraq uıym músheleriniń tártip buzǵanyn, olardyń keıbireýleri qamaýǵa alynǵanyn moıyndady.
Sýdan armııasy men jedel aralasý kúshteri arasyndaǵy azamattyq soǵys 2023 jyldyń sáýirinde bastaldy. Qaqtyǵys kezinde taraptar birneshe ret atysty toqtatý týraly ártúrli usynystarǵa kelisti, biraq olardyń eshqaısysy oryndalmady.
Osy jyldyń qyrkúıeginde AQSh Birikken Arab Ámirlikteri, Saýd Arabııasy jáne Mysyrmen birge úsh aıǵa gýmanıtarlyq bitimge kelýdi, odan keıin turaqty atysty toqtatý jáne beıbit ómirge birtindep kóshý týraly kelisimdi usyndy.
Osyǵan deıin Dúnıejúzilik densaýlyq saqtaý uıymy Sýdandy asharshylyq jaılaǵanyn aıtyp, dabyl qaqqany týraly habarladyq.