Sýdandaǵy qarýly qaqtyǵystardan qaza bolǵandar sany 459 adamǵa jetti
KAIR. TASS-QazAqparat - Sýdandaǵy armııa men jedel áreket etý kúshteri (arnaıy jasaq) arasyndaǵy qaqtyǵys saldarynan qaza tapqan beıbit turǵyndar sany 459 adamǵa jetti, 4 075 adam jaraqat aldy. Bul týraly Dúnıejúzilik densaýlyq saqtaý uıymynyń ókili málimdedi, dep habarlaıdy QazAqparat TASS aqparat agenttigine silteme jasap.
«Qaqtyǵystarda 459 adam qaza tapty, 4 075 adam jaraqat aldy, meniń oıymsha, olardyń naqty sany áldeqaıda kóp», - dep keltiredi Al Jazeera uıym ókiliniń sózderinen.
Sýdanda armııa men jedel áreket etý kúshteri arasyndaǵy qaqtyǵys ekinshi aptaǵa sozyldy. Hartým turǵyndary soǵys júrip jatqan aımaqtarda turyp jatyr, sebebi áskerı shtab pen prezıdent saraıy sııaqty birqatar nysan turǵyn úılerge jaqyn ornalasqan. Kóptegen otbasylar jaryqsyz, sýsyz qaldy. Turǵyndar úılerinen azyq-túlik pen sý alý úshin nemese qaladan qashý úshin ǵana shyǵady.
Buǵan deıin Sýdannyń Azamattyq avıatsııa basqarmasy eldiń áýe keńistigin 30 sáýirge deıin jabýdy buıyrǵan bolatyn. Birqatar álemdik kóshbasshy Sýdandaǵy qaqtyǵysqa qatysýshy taraptardy juma kúni bastalǵan Id ál-Fıtr (Oraza aıt) kezinde atysty toqtatý rejımin ustanýǵa shaqyrdy. BUU Bas hatshysy Antonıý Gýterrısh te beıbit turǵyndarǵa qaýipsiz jetýge múmkindik berýge úndedi.
Buǵan deıin Qazaqstannyń Sýdannan óz azamattaryn qaýipsiz jerge evakýatsııalaǵany týraly habarlanǵan bolatyn.
