Sýdandaǵy qaqtyǵysqa qatysýshy taraptyń biri 72 saǵatqa oq atýdy toqtatatynyn málimdedi

AMMAN. QazAqparat – Sýdandaǵy Jedel qoldaý kúshteri (Rapid Support Forces, RSF) áskerı toby Hartýmda qarýly qaqtyǵys jalǵasyp jatqan kezde 72 saǵatqa oq atýdy toqtatatynyn málimdedi, dep habarlaıdy QazAqparat tilshisi AlJazeera-ǵa silteme jasaı otyryp.

RSF málimdemesinde juma kúni Oraza aıt merekesine oraı jergilikti ýaqytpen 6:00-den (Astana ýaqytymen 07:00) bastap 72 saǵat boıy oq atpaıtyny jazylǵan.

«Kelisim Id al-Fıtr (Oraza aıt) merekesine týra kelip otyr, bul kezde gýmanıtarlyq dálizder ashylyp, azamattarǵa evakýatsııalanýǵa jáne týǵan-týystaryn merekemen quttyqtaýǵa múmkindik beriledi», - delingen málimdemede.

Al Sýdan áskeri oq jaýdyrmaý rejımin ustanatyny jóninde habarlaǵan joq.

Juma kúni tańerteń Hartýmǵa oq jaýdyryldy, osyǵan baılanysty RSF áskerdi astanaǵa shabýyl jasady dep aıyptaǵan edi.

Budan birneshe kún buryn Abdel Fattah ál-Býrhan basqaratyn ásker men general Muhamed Hamdan Dagalo jetekshilik etetin RSF bitimge kelýge birneshe márte talpynǵan edi. Alaıda odan nátıje shyqpady.

Qazirgi tańda keminde 350 adam kóz jumdy.

Myńdaǵan beıbit turǵyn Hartýmnan qashýǵa májbúr boldy.

BUU bosqyndar isteri jónindegi agenttiginiń málimetine sáıkes, Chadpen shekara asyp qashqandardyń basym bóligi - áıelder men balalar.