Sýdandaǵy áskerı tóńkeris: el prezıdenti Omar ál-Bashır qamaýǵa alyndy
ASTANA. QazAqparat - Hartýmnan Sýdan basshylyǵy ókilderiniń tutqyndalǵany týraly aqparat tústi. El prezıdenti Omar ál-Bashır joǵary shendi tulǵalarmen birge memlekettik tóńkeris jasaǵan áskerılerdiń qamaýyna alyndy, dep habarlaıdy Al-Hadath telearnasy.
Prezıdent gvardııasynyń basshysy, sondaı-aq burynǵy qorǵanys mınıstri Abdel Rahım Muhammed Hýseınniń tutqyndalǵany habarlandy. Eldegi «Ulttyq kongress» bıleýshi partııasynyń basshysy Ahmed Harýn men Sýdannyń burynǵy vıtse-prezıdenti Alı Osman Tah ta ustalǵan.
Telearnanyń deregi boıynsha, memleket basshysyn osy elde tóńkeris jasaǵan áskerıler qamaýǵa alǵan.
Myńdaǵan adam Hartým kóshelerinde júr. Munda ereýil senbi kúnnen beri bolyp jatyr.
Taıaý ýaqyttarda eldiń áskeri memlekettik telearnalar men radıolardan resmı málimdeme jasaýy múmkin. Hartýmda birneshe ýaqyt buryn áskerdiń bas qolbasshylyǵynyń jabyq otyrysy bastaldy. Oǵan ál-Bashır qatysqan joq.
El astanasynyń kóshelerinde áskerdiń qosymsha jasaqtary tartylyp, bronetehnıka ornatylǵan. Hartýmnyń halyqaralyq áýejaıy jabyq tur.
