Sýdanda tolassyz jaýǵan jańbyrdan qaza tapqandar sany 138-ge jetti
HARTÝM. KAZINFORM – Sýdannyń 10 shtatynda jaýǵan nóser jaýyn qurbandarynyń sany 138 adamǵa jetti. Bul týraly seısenbi kúni eldiń Densaýlyq saqtaý mınıstrligi habarlady, dep jazady Sınhýa agenttigi.
– Jalpy 129 650 adamy bar 31 666 otbasymen baılanysty 138 ólim tirkeldi, – delingen vedomstvo habarlamasynda.
Mınıstrliktiń málimetinshe, 12 420 úı tolyǵymen qulaǵan.
Sonymen qatar, Sýdannyń bes shtatynda tyrysqaq aýrýynyń jańa 102 jaǵdaıy tirkeldi jáne bes adam qaıtys boldy. Juqtyrǵandar men qaıtys bolǵandardyń jalpy sany sáıkesinshe 1223 jáne segizge jetti.
Aıta keteıik, buǵan deıin Sýdanda jańbyr men sý tasqynynan qaza tapqandar sany 77-ge jetkenin jazǵan edik.
Birikken Ulttar Uıymynyń Sýdandaǵy gýmanıtarlyq isterdi úılestirý keńsesi eldi jaýǵan nóser jańbyrdan týyndaǵan sý tasqynynyń saldarynan 73 myń adamnyń zardap shekkenin, 14 myń úıdiń ishinara nemese tolyǵymen qıraǵanyn habarlady.
