Sýdanda sý tasqynyna baılanysty tótenshe jaǵdaı engizildi
HARTÝM. QazAqparat – Eldegi joıqyn sý tasqynyna baılanysty Sýdanda tótenshe jaǵdaı engizildi, dep habarlaıdy QazAqparat Al Jazeera-ǵa silteme jasap.
Sýdan bıligi ondaǵan adamnyń ómirin qıǵan tasqynnan keıin eldiń búkil aýmaǵyn tabıǵı apat aımaǵy dep jarııalap, elde úsh aı merzimge tótenshe jaǵdaı rejımin engizdi.
«Tabıǵı apat saldarynan 99 adam mert boldy, 46 adam zardap shekti, jarty mıllıonnan astam azamatqa zııan shekti, 100 myńnan astam úı ishinara jáne tolyǵymen qıraǵan», - dep málimdedi Sýdannyń eńbek jáne áleýmettik damý mınıstri Lena el-Sheıh.
Bıliktiń habarlamasy boıynsha, jaýyn-shashyn men onyń saldarynan týyndaǵan sý tasqyny osyǵan deıingi kórsetkishterden, sonyń ishinde 1946 jáne 1988 jyldardaǵy rekordtyq kórsetkishterden asyp tústi. Nátıjesinde jarty mıllıonnan astam adam úılerin tastap ketýge májbúr boldy.
Sýdannyń SUNA aqparat agenttiginiń habarlaýynsha, eldiń Qaýipsizdik jáne qorǵanys keńesi sý tasqynynyń saldaryn joıý týraly komıtet qurylǵanyn habarlady. Elde jańbyr men sý tasqyny bolýy múmkin ekenin eskertti. Kók Nildegi sý deńgeıi 17,58 metrge deıin kóterildi, dep habarlady Komıtet.
«Ádette belgili bir ýaqytta jańbyr jaýady, al adamdar sony eskere otyryp, basqa aımaqtarǵa kóshedi. Biraq bıyl Sýdanda jaýyn-shashyn burynǵydan mol tústi», - dedi klımattyń ózgerýi jónindegi sarapshy Marva Taha.
Sýdanda jańbyrly maýsym maýsym aıynan bastalyp, qazan aıyna deıin sozylady. Sonyń saldarynan jyl saıyn sý tasqyny bolady.
