Sýdanda sońǵy eki aıda 50 myńnan astam adam úıin tastap ketýge májbúr boldy
ASTANA. KAZINFORM — BUU-nyń Halyqaralyq kóshi-qon uıymy (HKU) Sýdannyń ońtústigindegi Kordofan óńirinde qaýipsizdik jaǵdaıynyń ýshyǵýyna baılanysty sońǵy eki aıda 50 myńnan astam adamnyń óz úıin tastap ketýge májbúr bolǵanyn málimdedi. Bul týraly Anadolu habarlady.
Basylymnyń jazýynsha, sońǵy kúnderi Soltústik, Batys jáne Ońtústik Kordofan provıntsııalary ornalasqan aımaqta Sýdan armııasy men Jedel áreket etý kúshteri (JÁK) arasynda qııan-keski qaqtyǵystar júrip jatyr.
— Qaýipsizdik deńgeıiniń tómendeýine baılanysty 25 qazan men 17 jeltoqsan aralyǵynda Kordofan óńiriniń ártúrli eldi mekenderinen 50 445 adam úılerin tastap ketýge májbúr boldy, — delingen HKU málimdemesinde.
Oryndardaǵy kóshi-qondy baqylaý toptarynyń habarlaýynsha, qaqtyǵystar kúsheıgen 25 qazannan beri jalpy sany 39 oqıǵa jappaı halyqtyń kóship-qonýyna sebep bolǵan.
Eske sala ketsek, Sýdannyń Kordofan óńirinde dronnyń shabýylynan 104 beıbit turǵyn qaza tapty.
Buǵan deıin BUU Sýdan halqynyń úshten eki bóligi gýmanıtarlyq kómekke zárý ekenin málimdegen. Jalpy, eldegi azamattyq soǵys saldarynan kelgen adam shyǵynynyń naqty deregi joq. Alaıda BUU málimetine sáıkes, Ońtústik Sýdanda shamamen 9,3 mln adam gýmanıtarlyq kómekke muqtaj.