Sýdanda kúsh qurylymdary arasynda qarýly qaqtyǵys bastaldy
HARTÝM. QazAqparat – Sýdan astanasy – Hartýmda qarý daýysy men jarylystar estilip jatyr. Munda birneshe kúnnen beri armııa men Áskerılendirilgen shuǵyl áreket etý kúshteri arasynda tartys júrip jatyr. Qalada sondaı-aq ushaqtar ushyp júr, olar armııaǵa tıesili bolýy múmkindigi jazylýda, dep habarlaıdy QazAqparat VVS-ge silteme jasap.
Armııa – general Abdel Fattah al-Býrhan basshylyq etetin áskerı úkimetke (Egemendi keńes), al Shuǵyl áreket etý kúshteri – vıtse-prezıdent, general Mohamed Hamdan Dagaloǵa baǵynady.
Usynylyp otyrǵan azamattyq basqarýǵa kóshý sheńberinde Shuǵyl áreket etý kúshteri qarýly kúshter quramyna biriktirilýi kerek. Biraq generaldar munyń qaı ýaqytta iske asyrylýy tıistigine qatysty máselede bir mámilege kele almaı otyr. Bul daý-damaı qarýly kúreske ulasty.
Reuters-tiń jazýynsha, atys Hartým qalasyndaǵy armııa shtaby mańynda estilip jatyr. Shuǵyl áreket etý kúshteri astanalyq áýejaıdy jáne prezıdent saraıyn óz baqylaýyna alǵanyn málimdedi. Alaıda, qazirgi ýaqytta buǵan dálel bolatyn qandaı da bir málimet joq.
Óz kezeginde armııanyń aıtýynsha, Shuǵyl áreket etý kúshteri olardyń shtabyn basyp alýǵa áreket etip jatyr.
Áskerıler Sýdanda bılikti 2021 jyly basyp aldy, sodan beri ony óz ýysynda ustap otyr. Olar bılikti azamattyq úkimetke bermek, biraq mundaǵy kedergi Shuǵyl áreket etý kúshteriniń qarýly kúshtermen biriktirilý merzimi bolyp otyr. Shuǵyl áreket etý kúshteri muny 10 jylǵa keıinge shegerý kerektigin alǵa tartsa, armııa 2 jyl merzimge ǵana kelisip otyr.
