Sýdanda gýmanıtarlyq jaǵdaı qıyndap barady

ASTANA. KAZINFORM - 2023 jyldyń sáýirinde bastalǵan Sýdandaǵy soǵys álemdegi eń jyldam ýshyǵyp bara jatqan gýmanıtarlyq daǵdarystardyń birine aınaldy, dep habarlaıdy Aljazeera.

Humanity & Inclusion uıymynyń málimetinshe, beıbit turǵyndardyń, ásirese múgedektigi bar adamdardyń jaǵdaıy asa kúrdeli deńgeıge jetken.

Qaqtyǵys saldarynan 11,6 mıllıonnan astam adam bosqynǵa aınalǵan, al 33 mıllıonnan astamy gýmanıtarlyq kómekke muqtaj. Sonymen qatar shamamen 3 mıllıon adam, negizinen urys qımyldarynyń qarqyny báseńdegen óńirlerge, óz úılerine qaıta oralǵan.

Sýdan halqynyń shamamen 16 paıyzy nemese 4,6 mıllıon adam múgedektigi bar jandar sanatyna jatady. Olardyń jaǵdaıy evakýatsııadaǵy qıyndyqtar, kómektiń joqtyǵy jáne zorlyq-zombylyqtan qorǵaný múmkindiginiń tómendigi saldarynan odan ári kúrdelene túsken. Buǵan qosa, úılerine oralý protsesi mınalar men basqa da jarylǵysh zattardyń qaýpine baılanysty qıyndap otyr.

Osyǵan deıin BUU Qaýipsizdik keńesi Sýdandaǵy jedel áreket etý kúshteriniń komandırlerine sanktsııa salǵan bolatyn.