Sýdanda eki kúnde 4 myńnan astam adam úıin tastap ketýge májbúr boldy
ASTANA. KAZINFORM – Sýdannyń Soltústik Kordofan shtatynda qaýipsizdik jaǵdaıynyń nasharlaýyna baılanysty eki kún ishinde 4,2 myńnan astam adam úıin tastap ketýge májbúr boldy, dep habarlaıdy Anadolu agenttigi.
Halyqaralyq kóshi-qon uıymynyń (HKU) málimetinshe, 14-15 tamyzda Shıkan aýdanyndaǵy Ým-Arda, Tamıd jáne Al-Hor-el-Abıad aýyldarynan shamamen 4250 adam qonys aýdarǵan.
Turǵyndardyń bir bóligi Shıkan aýdanyndaǵy basqa eldi mekenderge, qalǵandary el astanasy Hartýmnyń batysynda ornalasqan Omdýrman qalasyna bet alǵan.
HKU óńirdegi jaǵdaı áli de shıelenisti ári turaqsyz ekenin atap ótti. Uıym ahýaldy baqylaýdy jalǵastyryp jatyr.
Buǵan deıin táýelsiz Emergency Lawyers quqyq qorǵaý uıymy Ým-Arda aýdanynda Jedel qoldaý kúshteriniń (RSF) shabýylynan 14 beıbit turǵyn qaza taýyp, taǵy ondaǵan adam jaralanǵanyn habarlaǵan.
Sýdannyń áskerı derekkózderiniń málimetinshe, armııa Soltústik Kordofan shtatynyń ákimshilik ortalyǵy El-Obeıdtiń ońtústik-batysyndaǵy Djebel-Hashaba jáne Ým-Arda aýdandarynda RSF shabýylyna toıtarys bergen. Sýdan Qarýly kúshteri Djabra-esh-Sheıh aýdanyndaǵy taǵy bir shabýyldyń da toıtarylǵanyn málimdedi.
Armııa men RSF arasyndaǵy qaqtyǵystar 2025 jylǵy qazannan beri Kordofan aımaǵynyń Soltústik, Batys jáne Ońtústik Kordofan shtattarynda jalǵasyp keledi.
Sýdan armııasy men Jedel qoldaý kúshteri arasyndaǵy qarýly qaqtyǵys 2023 jylǵy sáýirde bastalǵan. BUU baǵalaýynsha, sodan beri ondaǵan myń adam qaza taýyp, shamamen 13 mln adam úıin tastap ketýge májbúr bolǵan.
Aıta keteıik, buǵan deıin DDU basshysy Sýdanda tyrysqaq aýrýy órshigenin habarlady.
