Sýdanda áýe shabýylynan 17 beıbit turǵyn qaza tapty
HARTÝM. ANADOLY. QazAqparat - Sýdan astanasy Hartýmǵa áýeden soqqy jasalyp, saldarynan 17 beıbit turǵyn qaza tapty, onyń beseýi – bala. Bul týraly «Ońtústik beldeýiniń jedel járdem ortalyǵy» uıymynyń belsendileri málimdedi, dep habarlaıdy QazAqparat Anadoly agenttigine silteme jasap.
Oqıǵa senbi kúni keshke bolǵan. Saldarynan 11 adam jaraqat aldy.
Shabýyldyń artynda kim turǵany belgisiz. Jedel áreket etý kúshteri jaýyngerleri Hartým aýdandaryna shabýyl jasaǵan ushaqty atyp túsirgenin habarlady.
Osy oqıǵaǵa baılanysty Sýdan armııasy eshqandaı túsinikteme bergen joq.
Úkimet armııasy men Jedel áreket etý kúshteri senbide 72 saǵatqa atysty toqtatý týraly kelisimge qol qoıǵan bolatyn.
Kelisim jeksenbi kúni jergilikti ýaqytpen tańǵy saǵat 6-da kúshine endi.
