Sýdanda áskerdi qoldaýǵa arnalǵan jappaı mıtıngiler ótti

ASTANA. KAZINFORM — Sýdanda myńdaǵan adam birneshe qalada jınalyp, el áskerine qoldaý bildirdi. Bul týraly Anadolý agenttigi jazdy.

Áskerı qaqtyǵystar jalǵasyp jatqan Sýdanda keıbir memlekettik mekemelerdiń úndeýimen turǵyndar kóshege shyǵyp, armııany qoldaıtyndaryn kórsetti.

Mıtıngiler Port-Sýdan, Atbara, Hartým, Gadarıf, Dýngýla, Demazın, ed-Debbe, Vad-Medenı, Vadı-Halfa, Sınkat, Sınnar, Metemme, Merevı jáne Kassala qalalarynda ótti. Sherýge qatysýshylar Sýdannyń memlekettik tý qolǵa ustap shyqty.

Narazylyq bildirýshiler «Birtutas ásker – birtutas halyq», «Biz bárimiz – áskerimiz», «Barlyq kúsh Fashırge» dep urandatty.

Áskerdi qoldaı otyryp, demonstranttar Jedel áreket etý kúshterin (SBR) «terrorıstik uıym» dep tanýǵa shaqyrdy.

Sýdannyń Egemendik keńesiniń tóraǵasy ári armııa qolbasshysy, general-polkovnık Abdýl-Fattah ál-Býrhan mıtıngilerge baılanysty X áleýmettik jelisindegi paraqshasynda jazba jarııalady.

«Biz Sýdannyń dańqty halqyna alǵys aıtamyz. Sizder árdaıym qoldaýdyń, tirektiń jáne kúshtiń, qarsylasý men janqııarlyqtyń qaınar kózi bolyp keldińizder. Óz sózine jáne ýádesine adal qarýly kúshterińiz árdaıym tirek, úmit pen adaldyqtyń sımvoly bolyp qala beredi», dedi ol.

Sýdannyń resmı SUNA agenttiginiń habarlaýynsha, premer-mınıstr Kamıl Idrıs te Sýdan halqynyń qarýly kúshterdi berik qoldaıtynyn jáne eldiń ishki isterine syrttan aralasýdy aıyptaıtynyn atap ótip, bul ustanymdy búkil álemge jetkizgenin málimdedi.

Al mádenıet, aqparat jáne týrızm mınıstri Halıd ál-ıAısır X áleýmettik jelisindegi jazbasynda eldiń túkpir-túkpirinen kelgen halyqtyń úndeýi aıqyn ekenin atap ótti.

Aıta keteıik, Tramp Sýdandaǵy soǵysty toqtatatynyn málimdegen edi. 

Al BUU Sýdandaǵy zorlyq-zombylyqty toqtatýǵa shaqyrdy.