Sýdan zardap shekkenderdiń zaqymdanǵan dúnıe-múlki qalaı qalaı baǵalanady
PETROPAVL. KAZINFORM – Soltústik Qazaqstan oblysy Qyzyljar aýdanynda tabıǵı apattan zardap shekken turǵyndardyń shyǵyny eseptele bastady. Qazir mamandar sýda qalǵan baspanalar men dúnıe-múlikti zerttep, baǵalap jatyr.
SQO-da sý tasqynynyń zardabyn Qyzyljar aýdany eń kóp tartty. Jergilikti ákimdiktiń málimetinshe, aýdan boıynsha 1485 úı sýǵa ketti. Onyń 197-si – Beskól aýylynda. Qazirgi ýaqytta tasqyn sýdyń beti qaıtqan. Turǵyndardyń keıbiri úılerine kirýge múmkindik aldy.
«13 sáýir kúni sý keldi. Úıdiń qabyrǵasynan-aq kórýge bolady, sý bir metrden astam kóterildi. Al úıdiń ishinde bıiktigi 10-15 sm-deı boldy. Soǵan qaramastan dúnıe-múlikke zııan keldi. Jańa úı, 2018 jyly ǵana kirgen edik. Jóndeý qajet, tehnıkamyz isten shyqty. Qazir maman tehnıkalyq zertteý júrgizip, kelgen shyǵyndy baǵalap jatyr. Tańerteń habarlasyp, ótinish tastadym, keshke keldi», - deıdi Beskól aýylynyń turǵyny Ermek Maýytov.
19 sáýirden bastap Qyzyljar aýdanynda baǵalaýshy kompanııa ókilderi jumys istep jatyr.
«Búginge deıin 100-den astam úı qaraldy. Sý ketken baspanalarǵa tehnıkalyq zertteý júrgizip jatyrmyz. Eshkim umyt qalmaıdy, bul jumysty tez arada aıaqtaýdy josparlap otyrmyz. Eń aldymen zaqymdanǵan múlikti qarap, sýretke túsiremiz. Edenderin, qabyrǵalaryn kóremiz, elektrıkasyn qaraımyz. Turmystyq tehnıkaǵa servıs ortalyqtan servıstik qorytyndy kerek bolady, onyń isten shyǵyp, qalpyna keltirýge bolmaıtyndyǵy jóninde. ıAǵnı sýdan búlinse, baǵalaý úshin servıstik ortalyqtyń qorytyndysy qajet. Óıtkeni biz ondaı qorytyndy bere almaımyz», - deıdi «Grýppa kompanıı Ak bars-Fınans» JShS bas dırektory Mıdhat Fashýtdınov.
Sondaı-aq úıge baǵalaýshy mamandy shaqyrǵan turǵyndar qujattaryn – jeke kýálik pen úıdiń tehnıkalyq qujatyn túgendep otyrýy kerek.
Esterińizge salaıyq, sý tasqyny kezinde SQO-da 3,5 myńǵa jýyq turǵyn úı sý astynda qaldy. 14 myńnan astam adam qaýipti aýmaqtan evakýatsııalandy.
Birneshe kún sýda turǵan úılerdiń keıbiriniń qabyrǵalary qulap jatyr.
22 sáýirde oblystyq ákimdikte jıyn ótip, baspanasynan aıyrylǵan turǵyndardy úımen qamtý máselesi qaraldy.
SQO-da tasqynnyń saldarymen kúresýge 100-den astam arnaıy mehbrıgada qurylyp jatyr.
