Sýdan shyqqan jaǵymsyz ıis úshin Jezqazǵan ákimine sógis jarııalandy
ASTANA. QazAqparat - Jezqazǵan turǵyndary ystyq sýdyń sapasyna shaǵym aıtty. Qubyrdan jaǵymsyz ıisi bar las sý aqqan. Jaǵdaıdyń mán-jaıyn bilý úshin oblys ákimi Erlan Qoshanov oqıǵa ornyna orynbasary Anatolıı Shkarýpa bastaǵan topty jiberdi, dep habarlaıdy ákimniń saıty.
«Jyljymaly jınalys ótkizildi. Birqatar qosymsha sharalar qabyldandy, onyń ishinde jelilerdi taǵy bir márte jýý júrgizildi. Qazir ystyq sý sapasy jaqsardy, - dep málimdedi Anatolıı Shkarýpa apparattyq jınalys barysynda.
Onyń aıtýynsha, tutynýshylarǵa jiberiletin ystyq sýdyń zerthanalyq synaqtary turaqty túrde júrgizilip otyrady.
Oblys ákimi selektor boıynsha Jezqazǵan qalasynyń ákimi Batyrlan Ahmetovty shaqyrtyp, olqylyqtyń sebebin túsindirýdi talap etti. Qala ákimi sýyq erte túskendikten jylytý maýsymyn merzimnen buryn bastap, jeliler jýylyp úlgermegenin aıtty.
«Biz kir sý júredi dep oılamadyq, - dedi Batyrlan Ahmetov.
Mundaı jaýap Erlan Qoshanovtyń narazylyǵyn týdyrdy.
«Qalaısha oılamadyńyzdar! Ázirge qala ákimine sógis jarııalaımyn. Ári qaraı qyzmettik tergeý nátıjesi boıynsha kóremiz. Ystyq sýdyń sapasyn nazarda ustaýdy jalǵastyrý kerek jánede qyzmet túrin tolyqtaı qalypqa keltirińizder, - dedi aımaq basshysy.
Erlan Qoshanov qol astyndaǵy qyzmetkerlerine barlyq baǵyttaǵy jumystar boıynsha qatań suranys bolatynyn eskertip aıtty.
Sonymen qatar Jezqazǵan turǵyndary óz erikterimen ystyq jáne sýyq sýdyń úlgilerin Astanadaǵy táýelsiz saraptamaǵa - memlekettik sanıtarlyq-epıdemıologııalyq saraptama ortalyǵyna jibergeni belgili boldy.
Eske sala keteıik, jezqazǵandyqtar krannan aqqan sasyq sýǵa shaǵymdanǵandyǵy týraly habarlaǵan bolatynbyz.
