Sýdan men Efıopııa arasyndaǵy dıplomatııalyq janjal ýshyǵyp barady
ASTANA. KAZINFORM — Sýdan bıligi Gedaref qalasyndaǵy Efıopııa konsýldyǵyn jabý týraly sheshim qabyldap, dıplomatııalyq ókildik qyzmetkerlerinen 48 saǵat ishinde elden ketýdi talap etti. Bul týraly Kazinform Anadolu agenttigine silteme jasap habarlady.
Jergilikti BAQ-tyń málimetinshe, bul sheshim Efıopııanyń buǵan deıin jasaǵan áreketine jaýap bolǵan. Atap aıtqanda, Efıopııa bıligi Assosa qalasyndaǵy Sýdan konsýldyǵyn jaýyp, sýdandyq alty dıplomattan dál osyndaı merzimde elden ketýdi talap etken.
Kórshi memleketter arasyndaǵy dıplomatııalyq shıelenistiń kúsheıýine baılanysty Hartým tarapy ózara jaýap berý qaǵıdaty negizinde osyndaı shara qabyldaǵan.
Sýdan men Efıopııa arasyndaǵy qarym-qatynas eki eldiń qarýly toptardy qoldap otyr degen ózara aıyptaýynan keıin nasharlady.
Máselen, Sýdan armııasy Kók Nil shtatynda el aýmaǵyna Efıopııa jaqtan kirgen bolýy múmkin ushqyshsyz ushý apparatyn atyp túsirgenin málimdedi. Alaıda dronnyń kimge tıesili ekeni naqtylanbady.
Buǵan deıin Sýdan bıligi Efıopııany Jedel áreket etý kúshteriniń (RSF) eldegi azamattyq ınfraqurylym nysandaryna dronmen shabýyl jasaýyna óz aýmaǵyn paıdalanýǵa berdi dep aıyptaǵan. Osyǵan baılanysty Hartým BUU Qaýipsizdik Keńesi men Afrıka odaǵynyń Beıbitshilik jáne qaýipsizdik keńesine shaǵym joldaǵan.
Al Efıopııa Sýdandy Tygraı aımaǵyndaǵy kóterilisshiler toptaryna qoldaý kórsetti dep aıyptap otyr.
Eki el arasyndaǵy shıelenisti kúsheıtip otyrǵan taǵy bir másele — shekaradaǵy El-Fashaga aýmaǵyna qatysty kóp jyldan beri jalǵasyp kele jatqan jer daýy. Bul óńirde buǵan deıin qarýly qaqtyǵystar bolǵan.
Eske salaıyq, buǵan deıin Sýdannyń Soltústik Kordofan shtatynda qaýipsizdik jaǵdaıynyń nasharlaýyna baılanysty eki kún ishinde 4,2 myńnan astam adam úıin tastap ketýge májbúr bolǵanyn habarlaǵan edik.
