Sýdan qashyp shatyr ústinde otyrǵan turǵyndardy áýe desanttary qutqardy
ASTANA. KAZINFORM – Elimizde sý tasqyny bastalǵaly Qarýly kúshterdiń 5400-den astam jaýyngeri, 230 tehnıkasy, 12 tikushaǵy, 5 áskerı ushaǵy aımaqtarǵa attandy. Bul týraly Jibek Joly telearnasynda «Biz birgemiz» telemarafonynda aıtyldy.
Sý tasqynymen kúres bastalǵaly Qarýly kúshterdiń jeke quramy birden atsalysty. Respýblıkalyq jedel shtabtyń sheshimimen jáne Qorǵanys mınıstriniń tapsyrmasymen búkil aımaqtarǵa áskerıler jumyldyryldy.
«Ásirese eń qaýyrt jumys – áskerı ushqyshtardyń moınyna tústi. Olar kúni-túni aýysymmen jumys istep, Qostanaı oblysynda bolǵan alǵashqy sý tasqynynda bir kúnde 200-den astam azamattardy evakýatsııalady. Tipti desanttaý jolymen shatyrdyń ústinen turǵyndardy qutqarǵan sátter de boldy. Bul da úlken sheberlikti talap etedi. Sondyqtan ushqyshtardyń eńbegi zor boldy», - dedi Qorǵanys mınıstrliginiń resmı ókili Rýslan Jangýlın telemarafonda.
Sondaı-aq, áskerı ınjenerler de qutqarý jumystaryna belsene aralasty. Olar Aqtóbe oblysyndaǵy Oıyl ózeni mańynda áli kúnge deıin adamdardy, júkterdi, tehnıkalardy parom arqyly tasymaldap jatyr.
«Áskerı-medıtsınalyq brıgadalardyń mamandary da sý basqan aımaqtarǵa attandy. Olar jeke quramnyń densaýlyǵyn saqtaýmen aınalysty jáne turǵyndarǵa da medıtsınalyq kómek kórsetti. Oǵan jalpy 4 brıgada, elýden astam áskerı medıtsına mamandary tartyldy», - dep tolyqtyrdy spıker.
Sý tasqyny aıaqtalǵan soń, zalal kelgen aýmaqtardy dezınfektsııalaý sharalary júrgiziledi. Qazirdiń ózinde mınıstrliktiń radıatsııalyq, hımııalyq-bıologııalyq qorǵaý bólimsheleri de Aqtóqbe, Atyraý oblystarynda dezınfektsııalaý sharalaryn bastap ketti.
Aıta keteıik, sý tasqynyndaǵy el birligine arnalǵan «Biz birgemiz» telemarafony Jibek Joly arnasynda jalǵasyp jatyr. 5 saǵattyq tikeleı efırde tasqyn basqan aýmaqty kózben kórgen, tabıǵı apattan zardap shekken turǵyndardyń jan tebirenter oqıǵalary aıtylyp, tabıǵı apat aımaqtarynan reportajdar beriledi. Buǵan deıin sý basqan aımaqtarǵa birinshi bolyp kómekke attanǵan TJM qutqarýshylary, sarbazdar men tártip saqshylary suhbat bergen edi.
