Sýdan áskeri prezıdent saraıyn óz baqylaýyna alǵanyn málimdedi

ASTANA. KAZINFORM – Sýdan áskeri Hartýmdaǵy prezıdent saraıyn eki jylǵa jýyq ýaqyt boıy qandy azamattyq soǵys júrgizip kele jatqan áskerı qurylym – Jedel qoldaý kúshterinen óz baqylaýyna alǵanyn málimdedi, dep habarlaıdy BBC.

BBC málimetinshe, Sýdan áskeri eki jyl buryn qarsylas Jedel qoldaý kúshteri yǵystyryp shyǵarǵan el astanasy Hartýmdy qaıta baqylaýyna alyp otyr.

Áskerdiń resmı ókili Nabıl Abdalla memlekettik telearna efırinde áskerılerdiń prezıdent saraıyn jáne Hartým ortalyǵyndaǵy mınıstrlik ǵımarattaryn baqylaýǵa alǵanyn málimdedi.

– Bizdiń kúshter qarsylastyń tehnıkasy men jasaqtaryn tolyq joıyp, kóptegen qarý-jaraq pen áskerı jabdyqtardy qolǵa túsirdi, – dep málimdedi Abdalla.

Sondaı-aq ol armııanyń «tolyq jeńiske» jetkenshe kúresýdi jalǵastyratynyn aıtty.

Jedel qoldaý kúshteri bul jaǵdaıǵa qatysty túsinikteme berýden bas tartty.

Hartýmda eki jyl buryn bastalǵan azamattyq soǵys Sýdandy qaqtyǵystar men qantógiske dýshar etti. 2021 jyly eldi 30 jyl basqarǵan prezıdent Omar ál-Bashır bılikten ketkennen keıin, eldi áskerı bılik basqardy.

Hartýmdy qaıta alý – Sýdan qarýly kúshteri úshin úlken jeńis bolyp, soǵystyń betburysty kezeńine aınalýy múmkin. Sońǵy aptalarda ásker eldiń ortalyq aýdandarynda da aıtarlyqtaı jetistikterge qol jetkizdi.

Beısenbi kúni kýágerler Respýblıkalyq saraı mańynda drondar men áýe soqqylarynyń jarylystary bolǵanyn habarlady. Senbi kúni vıdeoúndeý jasaǵan Jedel qoldaý kúshteriniń jetekshisi Hametı prezıdent saraıyn jáne onyń aınalasyndaǵy aýdandardy qorǵaýǵa ýáde berip, eldiń soltústigindegi birneshe qalaǵa jańa shabýyldar jasaýǵa qaýpin tóndirdi.

BUU derekterine sáıkes, Sýdandaǵy soǵys álemdegi eń aýqymdy gýmanıtarlyq daǵdarysqa ákeldi. Qaqtyǵysqa qatysýshy eki tarap ta adam quqyqtarynyń jappaı buzylýyna aıyptalýda. Beıbit kelissózder jasaý áreketteri birneshe ret sátsizdikke ushyrady, óıtkeni eki jaq ta strategııalyq aımaqtarǵa baqylaý ornatý úshin kúresti jalǵastyrýǵa ant bergen.