Sýdan álemdegi eń aýyr asharshylyqqa tap boldy
ASTANA. KAZINFORM – BUU-nyń gýmanıtarlyq agenttikteri sársenbi kúni Sýdanda 11 aı buryn bastalǵan áskerı qaqtyǵys «álemdegi eń aýyr asharshylyqty» týdyrýy múmkin ekenin eskertti, dep habarlaıdy BUU jańalyqtar ortalyǵy.
BUU Dúnıejúzilik Azyq-túlik baǵdarlamasy (WFP) atap ótkendeı, el qazirdiń ózinde el halqynyń májbúrli qonys aýdarýyn bastan keship otyr. Sýdan armııasy men Jedel áreket etý kúshteri (RRF) dep tanymal top arasyndaǵy shaıqas saldarynan myńdaǵan adam qaza taýyp, segiz mıllıonnan astam sýdandyq bosqynǵa aınalǵan.
BUU Balalar qorynyń (ıÝNISEF) habarlaýynsha, qazirgi kezde Sýdan 14 mln balanyń ómirin qutqaratyn kómekke muqtaj bolyp otyr. Gýmanıtarlyq qyzmetkerler sondaı-aq urys toqtamasa, qaqtyǵys Sýdan shekarasynan asyp, búkil aımaqtaǵy qaýipsizdikke qaýip tóndiretinin eskertti.
«Jıyrma jyl buryn Darfýr álemdegi eń aýyr asharshylyqty bastan keshkende, álem daǵdarysqa jaýap berý úshin birikti. Biraq búginde Sýdan halqy nazardan tys qaldy. Mıllıondaǵan adamnyń ómiri men tutas bir aımaqtyń tynyshtyǵy men turaqtylyǵyna qaýip tónip tur», - dedi Ońtústik Sýdannan kelgen WFP atqarýshy dırektory Sındı MakKeın.
Qazirgi ýaqytta Sýdandaǵy 18 mln adamǵa azyq-túlik jetpeı otyr. Dúnıejúzilik azyq-túlik baǵdarlamasynyń sońǵy derekterine sáıkes, el turǵyndarynyń bes paıyzdan azy ǵana tolyq túski nemese keshki as ishýge múmkindigi bar.
