Sýda júzýden álem kýboginde qazaqstandyqtar 8 medal jeńip aldy
NUR-SULTAN. QazAqparat - Mamyrdyń 30-y men maýsymnyń 2-i aralyǵynda Italııanyń Lınıano Sabbıadorro qalasynda sýda júzýden paraálem kýbogi ótti, dep habarlaıdy QazAqparat QR Ulttyq paralımpıada komıtetine silteme jasap.
Halyqaralyq deńgeıdegi sport básekesine álemniń 31 elinen 260 sportshy, sondaı-aq 27 ıtalııalyq klýb komandalary qatysty.
Elimizdiń namysyn ulttyq paralımpıada qurama komandasy kiretin jáne óńirlerden kelgen 18 para júzýshi qorǵady.
«Kýbok nátıjesinde jalpy esep boıynsha І oryndy Italııa komandasy ıelendi, ІІ oryn Germanııaǵa buıyrsa, tıisinshe ІІІ orynǵa Ulybrıtanııa parasportshylary turaqtady. Qazaqstan jalpykomandalyq esepte 8 medalmen 6 oryndy ornyqty. Atap aıtqanda, elimizdiń qorjynynda 1 altyn, 5 kúmis jáne 2 qola júlde bar», - dep habarlaıdy komıtet.
