Sýda shomylý qaýipsizdiginiń erejeleri qandaı
ASTANA. QazAqparat - Jaz maýsymyndaǵy kúnniń ystyǵynda sýǵa, sonyń ishinde shaǵyn toǵandar, ózen-kólderge túsip, demalýshylar sany artatatyny belgili. Bul rette shomylý oryndarynda bolatyn qaıǵyly oqıǵalardyń sany da arta túsetini anyq. Osyǵan baılanysty Densaýlyq saqtaý mınıstrligi Qoǵamdyq densaýlyq saqtaý ulttyq ortalyǵynyń mamandary shomylý maýsymynda qandaı erejeler ustaný qajettigi týraly aıtyp berdi, dep habarlaıdy QazAqparat.
«Shomylý maýsymynda oqys oqıǵalardan týyndaıtyn qaýiptilik deńgeıi joǵary dárejede qala beredi. Bul jerde birinshi kezekte ásirese balalar qaýipsizdigine barynsha nazar aýdarylýy tıis. Jalpy jurt sýǵa ketý oqıǵasyn - sýdyń ortasynda tunshyqqan adamnyń aıqaılap qutqarýshylardy kómekke shaqyrýy dep elestetedi, al negizinde bul olaı emes, kerisinshe sýǵa ketý birshama tynysh protsess. Sondyqtan da, sýǵa túserde erejelerdi saqtap, ózińe de, aınalańa da muqııat bolý kerek. Sýda oınap, shomylyp júrgen balalar tynymsyz bolatynyn esten shyǵarmaý kerek. Al olar tynyshtalyp qalsa dereý alańdap, kómekke umtylý qajet», - deıdi Ortalyq sarapshylary.
Sonymen qatar, sarapshylar sýdaǵy, sý jaǵasyndaǵy demalys barysynda este bolýy tıis qaýipsizdik sharalaryn da alǵa tartyp otyr. Máselen, olar sýǵa ketý oqıǵasynyń aldyn alatyn 6 erejeni eskertedi:
1. Mektepke deıingi jastaǵy balalar úshin sýlardan alysyraq qaýipsiz alańdardy, oınaıtyn oryndardy qamtamasyz etý.
2. Balalardyń abaısyzda sýǵa túsip ketýinen saqtaıtyn qorshaýlar ornatý.
3. Mektep jasyndaǵy balalardy (6 jastan joǵary) júzý daǵdylaryna, sýdaǵy qaýipsizdik erejelerine úıretý, oqytý.
4. Sý tasqyny jáne basqa da qaterler týyndaǵanda jasalatyn sharalarǵa úıretý.
5. Sýǵa ketkenderdi qutqarý, olarǵa alǵashqy kómek kórsetý daǵdysyna úıretý.
6. Qaıyqtardy, kemeler men paromdardy paıdalanýda qaýipsizdik erejelerin saqtaý.
