Sýda qutqarý qyzmetiniń mamandary 23 adamdy aman alyp qalǵan
ASTANA. QazAqparat - Bıyl jyl basynan beri Astana sý qoımalarynda 44 adam oqys oqıǵaǵa tap bolǵan. Olardyń 23-i qutqarylǵan, al 21 adamdy qutqarý múmkin bolmaǵan. Mamandar munyń turǵyndardyń qaýipsizdik sharalaryn eskermeı, tyıym salynǵan jerlerde shomylýynan bolǵan oqıǵa ekendigin aıtady, dep jazady astana.kz.
Astana qalasy Esil aýdany TJB ınspektory Baýyrjan Beısenqanov bul jaǵdaıǵa qatysty bylaı deıdi: «Sýǵa túsken kezde qaýipsizdik erejelerin saqtaý kerek. Belgi qoıylǵan jerden tys maltyp ketýge bolmaıdy. Eń ókinishtisi, kóptegen oqys oqıǵalar ishimdik paıdalanǵannyń kesirinen oryn alady... Astana ortalyǵynda arnaıy sýǵa túsetin jaǵajaı bar. Osy belgilengen orynda ǵana sýǵa túsýge bolady».
Mamandardyń sózine súıensek, sýǵa ketkenderdiń 70-80 paıyzy 30 jasqa deıingi er-azamattar eken jáne olardyń kóbi ishimdiktiń býymen erejeni buzatyn kórinedi.
