Sýdıanyń otstavkaǵa shyǵatyn sýdıalyq jumys ótili jıyrma jylǵa deıin ulǵaıtylady

ASTANA. QazAqparat - Sýdıanyń otstavkaǵa shyǵýy úshin qajetti sýdıalyq jumys ótili on bes jyldan jıyrma jylǵa ulǵaıtylady. Bul týraly búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine Joǵary Sot Keńesi, sot júıesi jáne sýdıalardyń mártebesi týraly» zań jobasyn talqylaý barysynda málim boldy.

Aıta keteıik, zań jobasy Elbasy aıqyndaǵan bes ınstıtýtsıonaldyq reformasyn iske asyrý jónindegi «100 naqty qadam» Ult josparyn atqarý maqsatynda ázirlengen. Zań jobasynda sýdıalyqqa kandıdattarǵa qoıylatyn talaptardy qatańdatýǵa baǵyttalǵan normalar qamtylǵan. Budan bólek, zań jobasymen sýdıanyń kásibı qyzmetin baǵalaý belgilenedi. Máselen, alǵash ret ol sýdıa laýazymyndaǵy bir jyldyń nátıjeleri boıynsha, al keıinnen ár bes jyl saıyn júrgiziledi. Bul rette jıyrma jáne odan da kóp jyl sýdıalyq ótili bar sýdıalardyń kásibı qyzmetin merzimdi baǵalaýdan bosatylady.

«Sýdıanyń otstavkaǵa shyǵaýy úshin sýdıalyq jumys ótili on bes jyldan jıyrma jylǵa ulǵaıtylady. Sonymen qatar, Joǵarǵy sot janynda Sot tóreligi akademııasynyń jumys isteýi jáne Joǵarǵy Sot janyndaǵy Sot jıýrıiniń jańa qurylymyn qurý kózdeledi», - deıdi Joǵarǵy sot sýdıasy Aqyltaı Qasymov.

Zań jobasyna talqylaý barysynda senatorlar tarapynan birqatar ózgerister engizý qajettigi týyndaǵan. Atap aıtqanda, joǵarǵy palata depýtattary sýdıalyqqa kandıdattyń jumys ótiline qoıylatyn talaptardy túzetýdi usynyp otyr. Sonymen qatar, senatorlar Joǵarǵy Sottyń Tóraǵasy laýazymyna kandıdattar úshin mindetti sýdıalyq jumys ótili týraly talaptardy alyp tastaý qajet dep sanaǵan.