Sýdıalyqqa kandıdattarǵa qoıylatyn talaptar qataıtylady - Parlament
ASTANA. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine Joǵarǵy Sot Keńesi, sot júıesi jáne sýdıalardyń mártebesi týraly» QR Zańy qabyldandy. Eske salaıyq, buǵan deıin atalǵan qujatqa Senat tarapy birqatar túzetýler engizip, Májiliske qaıtarǵan bolatyn.
Aıta keteıik, Zań Elbasy aıqyndaǵan bes ınstıtýtsıonaldyq reformany iske asyrý jónindegi «100 naqty qadam» Ult josparyn atqarý maqsatynda ázirlengen. Bul rette Zańda sýdıalyqqa kandıdattarǵa qoıylatyn talaptardy qatańdatýǵa baǵyttalǵan normalar qamtylǵan. Budan bólek, zań normalarymen sýdıanyń kásibı qyzmetin baǵalaý belgilenedi. Máselen, alǵash ret ol sýdıa laýazymyndaǵy bir jyldyń nátıjeleri boıynsha, al keıinnen ár bes jyl saıyn júrgiziledi. Bul rette jıyrma jáne odan da kóp jyl sýdıalyq ótili bar sýdıalardyń kásibı qyzmeti merzimdi baǵalaýdan bosatylady.
Zań aıasyndaǵy taǵy bir jańalyq - sýdıanyń otstavkaǵa shyǵýy úshin sýdıalyq jumys ótili on bes jyldan jıyrma jylǵa ulǵaıtylyp otyr. Sonymen qatar, Joǵarǵy sot janynda Sot tóreligi akademııasynyń jumys istep, Joǵarǵy Sot janyndaǵy Sot jıýrıiniń jańa qurylymyn qurý qarastyrylady.
Senatorlar sýdıalyqqa kandıdattyń jumys ótiline qoıylatyn talaptardy túzetýdi, Joǵarǵy Sottyń tóraǵasy laýazymyna kandıdattar úshin mindetti sýdıalyq jumys ótili týraly talaptardy alyp tastaý qajet dep sanaǵan bolatyn. Bul túzetýmen Májilis depýtattary kelisti. Endi qujat Memleket basshysynyń qol qoıýyna joldanady.
