Sýdıalarǵa qatysty talap odan saıyn qataıa túsedi - B. Beknazarov
ASTANA. 28 shilde. QazAqparat /Qanat Mámetqazyuly/ - Sýdıalarǵa qatysty talap odan saıyn qataıa túsedi. Bul týraly búgin QR Joǵarǵy sotynyń tóraǵasy Bektas Beknazarov jýrnalıstermen resmı baspasóz máslıhatyn ótkizý barysynda málim etti.
Joǵarǵy Sot tóraǵasynyń aıtýynsha, búgingi kúni elimizdiń jekelegen óńirlerindegi sýdıalar biliktiligine qatysty máseleler barshylyq. máselen, byltyrǵy jyly respýblıka boıynsha 209 sýdıanyń sot tóreligin shyǵarýǵa qatysty monıtorıng júrgizilip, olardyń tómengi kórsetkishke ıe bolǵany anyqtalǵan. Bundaǵy 209-dyń ishinde 195 sýdıa aýdandyq deńgeıde bolsa, 14 oblystyq satydaǵy qyzmette bolyp otyr. «Monıtorıng nátıjesinde 8 sýdıa laýazymynan bosatyldy. 125 sýdıaǵa qatysty ister oblystyq sottardyń plenarlyq otyrystarynda máseleniń talqylanýymen shekteldi. Óıtkeni, keıinnen bul sýdıalar ózderiniń kórsetkishin jaqsartty. 15 sýdıaǵa qatysty máseleni oblystyq sottardyń jalpy plenarlyq otyrystary QR Joǵarǵy soty janyndaǵy sot qazylaryna joldady. Osydan soń 5 sýdıa qyzmetke kásibı jaramsyz dep tanylsa, 2-eýi óz erikterimen jumystan ketýge ótinish bergen. Al 6 sýdıaǵa kásibı biliktilikterin arttyrý týraly tıisti usynymdar berildi», - dedi B. Beknazarov.
Onyń aıtýynsha aǵymdaǵy jyldyń basynan beri 103 sýdıanyń qyzmetine monıtorıng júrgizilýde. Qazirdiń ózinde atalǵan 103 sýdıanyń ishindegi 8-i atqaryp otyrǵan qyzmetinen shettetilgen.
«Sondyqtan da búgingi kúni sýdıalardyń sot tóreligin shyǵarýǵa qatysty qatań talaptar qoıyla bastady. Kim buny durys júrgize almasa ótinish jazyp ornyn bosatýlary tıis. Al ornynan ketkisi kelmegender sot qazylary arqyly bosatylady. Bul rette taǵy qaıtalaǵym keledi, sýdıalarǵa qatysty talaptar barynsha qataldana túsedi», - dedi B. Beknazarov.
