Sýdıalardyń táýelsizdigi memleket tarapynan tolyǵymen qamtamasyz etildi - M.Álimbekov
ASTANA. 25 aqpan. QazAqparat /Arman Asqarov/ - Qazirigi tańda sýdıalardyń táýelsiz mártebesi bolý úshin memleket tarapynan barlyq jaǵdaı jasaldy.
Búgin Astanada «Sot bıliginiń táýelsizdigi: halyqaralyq tájirıbe» taqyrybyndaǵy halyqaralyq konferentsııada QR Joǵarǵy sot tóraǵasy Musabek Álimbekov osylaı aıtty.
Elimizdiń bas sýdıasy atap kórsetkendeı, búginde elimizdegi barlyq sýdıalardyń jalaqysy kóterilip, olardyń turǵyn-úı máseleleri respýblıkalyq bıýdjet esebinen sheshilip keledi. Sondaı-aq sýdıalardy kásibı daıyndaý jáne osy jaýapty qyzmetke taǵaıyndaý jumysy qatań baqylanyp otyr. «Sondyqtan men sýdıalardyń táýelsiz sot sheshimderin shyǵarýlary úshin, olardyń táýelsiz quqyqtyq mártebesi men táýelsiz oılaýy úshin memleket tarapynan barlyq jaǵdaı jasaldy dep oılaımyn. Árıne, táýelsiz oılaýdyń da ózindik talaptary bar. Ol onyń kásibı daıyndyǵyna tikeleı baılanysty. Al ishteı táýeldi bolyp qalyptasqan sýdıalardan qutylý qajet. Osylaı ǵana biz otandyq sot júıesiniń táýelsizdigin qamtamasyz ete alamyz», - deıdi M.Álimbekov.
