Sýdıalardyń qyzmetten ketýi nelikten jıiledi - Asanov sebebin atady
«Jalpy sot júıesiniń eń basty máselesi, bir ǵana problemasy bar dep atatyn bolsaq, ol - sýdıalyq kadrlar. Bıylǵa deıin sýdıalyqqa myqty zańgerler umtylmaıtyn. Nege? Óıtkeni, bizdiń bar qıynshylyǵymyzdy, jalaqymyz tómen ekendigin, júkteme kóp ekendigin biledi. Tipti prokýrorlar da, advokattar da, basqa zagerler de sotqa kelgisi joq. Sonda «sýdıa bolamyn dep konkýrsqa qatysyp jatqandar kimder?» degen suraq týady. Olardyń basym kópshiligi sottaǵy tehnıkalyq qyzmetkerler - sot hatshylary», - dedi ol 2019 jyldyń 1 jarty jyldyǵyndaǵy sot tóreligin júzege asyrý qorytyndysy qaralǵan keńeste.
Sonymen qatar, ol atalǵan qıynshylyqtarǵa shydamaı jasy zeınetke jetpese de óz erkimen jumystan shyǵyp ketetin sýdıalar qatary kóp bolǵanyn aıtty.
«Joǵarǵy sot keńesiniń otyrysynda árbir adamdy óz erkimen jumystan shyǵarý máselesi qaralady. Biz sonda odan «sebebi qandaı?» dep suraımyz. Negizinen eki-aq sebep aıtady. «Aldymen jalaqy az, odan keıin jeke ómirge ýaqyt joq» deıdi. Óıtkeni, kúnine árbir sýdıa 10 sheshim qabyldaıdy. Úshinshi sebep te bar. Nur-Sultan, Almaty, Shymkent qalalaryna, oblys ortalyqtaryna aýysý, basshylyq qyzmetke taǵaıyndalý boıynsha sot júıesiniń ishinde ádildik bolmaǵanyn alǵa tartady», - dedi Joǵarǵy sot tóraǵasy.
