Sýdıalardyń etıkalyq kodeksti saqtaýyna monıtorıng jasalýy kerek - E.Abdrasýlov

ASTANA. QazAqparat - Sýdıalardyń etıkalyq kodeksin júzege asyrý tetigi baǵytynda tolyqtyrý qajet. Búgin «Eýrazııalyq quqyq qorǵaý ortalyǵy» úkimettik emes uıymynyń ókili Ermek Abdrasýlov Ortalyq kommýnıkatsııalar qyzmetinde ótken brıfıngte osyndaı pikir bildirdi.

Brıfıng barysynda zańger Qazaqstannyń sýdıalarynyń qoldanystaǵy etıkalyq kodeksi tutastaı alǵanda, búgingi kúnniń aqıqatyna saı keletinin atap ótti.

«Degenmen, bul kodeksti tolyqtyryp, ózektendire túsý qajet dep sanaımyz. Óıtkeni búgingi tańda kodekstiń júzege asyrylýynda problemalar joq emes. Máselen, kodeksti tıimdi júzege asyrý tetigin oılastyrý qajet. Sonymen qatar barlyq sýdıalardyń osy kodeksti saqtaýyna monıtorıngti qarastyratyn normalarmen tolyqtyrylsa ıgi. Ondaı monıtorıng nátıjelerin qoǵamnyń talqysyna, sýdıalar qaýymdastyǵynyń qaraýyna engizý qarastyrylǵany durys», - dedi E.Abdrasýlov.

Aıta keterligi, Elbasynyń usynǵan bes ınstıtýtsıonaldyq reformasy aıasyndaǵy «100 qadam» Ult josparyn júzege asyrý baǵytynda sottardyń eseptiligin, ashyqtyǵyn kúsheıtý máselesine nazar aýdarylady. Sonymen birge reformaǵa oraı sýdıalardyń jańa etıkalyq kodeksin ázirleý júktelgen bolatyn. Osynyń arqasynda azamattar QR Joǵarǵy soty janynan arnaıy qurylatyn qazylar alqasyna sýdıa áreketteri boıynsha shaǵymdana alatyn bolady.