Sýdıalardyń abyroı-bedeli minsiz bolýy tıis - Qasym-Jomart Toqaev
«Kásibı sot korpýsy - bul barlyq sot reformalarynyń sheshýshi faktory. Sońǵy jyldary sýdıaǵa kandıdattarǵa talaptar arttyryldy, irikteýdiń zamanaýı quraldary engizildi. Myqty zańgerler, kórnekti ǵalymdar men quqyqtanýshylar sýdıalyq jumysta tájirıbesi bolmasa da sýdıa bola alady. Menińshe, bul jerde Joǵarǵy sot tóraǵasy Jaqyp Asanov úlken ról atqardy», - dedi Prezıdent.
Memleket basshysynyń paıymynsha, sotqa ekonomıka men quqyqtyń kúrdeli máselelerin erkin sheshe alatyn mamandardy tartý qajet.
«Bul - ýaqyt talaby. Ony men Joldaýymda da aıttym. Sýdıalardyń abyroı-bedeli minsiz, al kandıdattardy irikteý protsesi ashyq ári jarııa bolýy tıis. Damyǵan elderdiń kópshiliginde sýdıalarǵa qoıylatyn talaptardyń joǵary bolǵany sonshalyq, ótken ómirindegi bolmashy jat qylyǵy laýazymǵa ornalasýynan bas tartýǵa sebep te bolýy múmkin. Mundaı tájirıbe Qazaqstanda da qoldanylýy tıis dep esepteımin. Sýdıa kadrlardyń sapasyna jaýap beretin Joǵarǵy sot keńesine sýdıalardy irikteý jáne daıyndaý mindetin oryndaý júktelgen. Bul sapaly oryndalýy tıisti túbegeıli mańyzdy jumys», - dedi Qasym-Jomart Toqaev.