Sýdıalar jastardy jat qylyqtan aýlaq bolýǵa shaqyrdy
ASTANA. QazAqparat - Astana qalasy Kámeletke tolmaǵandar isteri jónindegi mamandandyrylǵan aýdanarlyq soty temeki ónimin kámeletke tolmaǵanǵa satý faktisi boıynsha ákimshilik is qaralyp, sot talqylaýyna qatysqan jasóspirimderge temeki ónimderin satýdyń quqyqtyq jaýapkershiligi jóninde túsindirý keńesi ótkizildi.
Elorda qalalyq sotynyń baspasóz qyzmetiniń habarlaýynsha, 18 jasqa tolmaǵandarǵa temeki satý jeke tulǵalarǵa - 20, shaǵyn kásipkerlik sýbektilerine - 40, orta kásipkerlik sýbektilerine - 60, iri kásipkerlik sýbektilerine 80 AEK (aılyq eseptik kórsetkish) mólsherinde aıyppul salýǵa ákep soǵady.
Jıynda Kámeletke tolmaǵandar isteri jónindegi mamandandyrylǵan aýdanarlyq sotynyń sýdıasy Janargúl Alpysbaeva jasóspirimdergesalaýatty ómir saltyn nasıhattap, dene tárbıesimen aınalysý, durys tamaqtaný, esirtkiden, temekiden, alkogoldi ishimdikterden aýlaq bolý qajettigin aıtty.
«Óskeleń jas urpaqty teris ádetterden saqtandyrý búginde ózekti máselege aınalyp otyr. Esirtki, ishimdik, temeki sııaqty zııandy ádetterden tyıyla almaı júrgen jastardy mundaı jat qylyqtardan aryltyp, jańa jolǵa salý bizdiń boryshymyz. Kúndelikti ómirde oryn alyp júrgen úlkendi-kishili qylmystardyń deni osy ishimdik pen esirtkiniń saldarynan bolatynyn biz jaqsy bilemiz. Zań ata-ananyń nemese basqa da zańdy ókilderdiń balalardy tárbıeleý jónindegi mindetterdi oryndamaýy zańda ákimshilik jaýapkershilikke ákep soqtyrady»,- dedi sýdıa Janargúl Alpysbaeva.
Ata-ananyń nemese basqa da zańdy ókilderdiń kámeletke tolmaǵan balalardy tárbıeleý men oqytý jónindegi mindetterdi oryndamaýy - 7 AEK mólsherinde aıyppul salýǵa ákep soǵady.
