Sýdıalar aqtaý úkimderin kóbirek shyǵarýdan qoryqpaý kerek - Q.Mámı

ASTANA. QazAqparat - Sýdıalarǵa jumys tásilin ózgertip, aqtaý úkimderin kóbirek shyǵarýdan qoryqpaý kerek. Búgin respýblıka sottarynyń 2015 jyldyń birinshi jartyjyldyǵynda atqarǵan jumys qorytyndylaryna arnalǵan keńeıtilgen keńeste QR Joǵarǵy sot tóraǵasy Qaırat Mámı osylaı málim etti.

Baıandama barysynda Joǵarǵy sot tóraǵasy Bas prokýratýra tarapynan qolǵa alynyp jatqan qamaýǵa sanktsııa berý týraly sottarǵa túsetin ótinishter sanyn qysqartý týraly bastamaǵa qoldaý bildirdi. «Qadaǵalaýshy organnyń derekterine súıensek, jyl basynan beri qamaýǵa alýlar sany tórt esege azaıypty. Bunymen qosa, kepildik berýdi qoldaný tájirıbesi keńeıip keledi. Ekinshi jaǵynan, birinshi jartyjyldyqta respýblıka sottary qaraǵan qamaýǵa alý sanktsııasy týraly 7 myń 559 ótinishtiń 7 myń 204-i nemese 95,7 paıyzy qanaǵattandyryldy. Bul neni kórsetedi? Qýdalaýshy organdary qamaýǵa alýǵa jaýaptylyqpen qaraı bastady degendi kórsete me? Bundaı jaǵdaıda sottarǵa qamaýǵa alýǵa sanktsııa berýden basqa jol da qalyp otyrǵan joq qoı», - dedi Qaırat Mámı.

Sonymen qatar Joǵarǵy sot tóraǵasy respýblıka sýdıalarynyń isterdi qaraý barysynda áli kúnge deıin aıyptap úkim shyǵarýdan aryla almaı kele jatqandyǵyna nazar aýdardy. Onyń sózine qaraǵanda, sýdıalardyń aqtaý úkimderi 2,1 paıyzdy ǵana quraıdy.

«Árıne, sýdıalarǵa jappaı aqtaý úkimderin shyǵarý kerek dep eshkim aıtpaıdy. Degenmen, eskerte ketetin jaıt, bizge jumys tásilin ózgertý kerek. Aqtaý úkimderine shekten shyǵatyndaı qorqynyshpen qaraýdyń qajeti shamaly. Onyń ústine bizdiń zańnamada qazirgi kúni qosymsha tergeýge jiberý degen uǵym joq. Sýdıa sońǵy sheshimdi shyǵarýy kerek. Sonymen qatar aqtaý úkimderi damyǵan shet elderdiń kúndelikti qoldanatyn tájirıbesi jáne biz de halyqaralyq standarttarǵa sáıkes bolýymyz kerek», - dedi Q.Mámı.