Sýdıa urlyq jasaǵandarǵa úkimdi mektepte shyǵardy
ASTANA. QazAqparat - Shymkentte 10 derek boıynsha isti bolǵan eki azamatqa halyq aldynda úkim shyqty. Qarataý aýdanynyń turǵyndaryna mıllıondaǵan shyǵyn keltirgen qaraqshylar jábirlenýshilerden keshirim surap, jazaǵa tartyldy. Kóshpeli sot otyrysyn, mektepterdiń birinde ótkizgen Qarataý aýdandyq soty qos azamatty bas bostandyǵynan aıyrdy, dep habarlaıdy QazAqparat «Tvk-uko» telearnasyna silteme jasap.
Óz kórshileriniń baǵaly zattaryn tonaǵan eki azamattyń biri 1994 jyly týǵan Erlan Atambekov. Al sybaılasy 25 jastaǵy Darhan Túktibaev. Ekeýi Qarataý aýdanyndaǵy birneshe úıge urlyqqa túsip, qoldy bolǵan zattardy tómen baǵamen satyp otyrǵan. Túsken qarjyny óz qajettilikterine jaratqan. Aıta ketý kerek, eki sottalýshy da buǵan deıin isti bolǵan. Máselen, Darhan ózge bireýge jaraqat salǵany úshin shartty túrde sotty bolsa, ekinshisi urlyq jasaǵany úshin jaýapkershilikke tartylǵan.
Talaı jurtty san soqtyrǵan azamattar halyq aldynda keshirim surap, istegen qylmystary úshin ókinetinin jetkizdi. Sondaı-aq buǵan deıin urlanǵan zattaryn ıelerine qaıtaryp, keshirimin alǵan. Osyǵan baılanysty olarǵa 3 jyl bas bostandyǵynan aıyrý jazasy taǵaıyndaldy.
«Sottalýshy Erlan Elikbaıuly Atambekov QR QK 188-babynyń 3-bóliginde kórsetilgen qylmysty jasaǵany úshin kináli dep tanylyp, qylmystyq jolmen tabylǵan ne qylmystyq jolmen satyp alynǵan múlki tárkilenip, 3 jyl bas bostandyǵynan aıyrý jazasy taǵaıyndalsyn. Sottalýshy Darhan Túktibaevqa taǵaıyndalǵan jaza qylmystyq atqarý júıesiniń ortasha qaýipsizdiktegi mekemesinde belgilensin», - dep úkimdi jarııa etti Qarataý aýdandyq sotynyń tóraǵasy Ermahan Rahmanberdi.
Qarataý aýdandyq soty buǵan deıin de 6 ret kóshpeli sot otyrysyn ótkizip, sottalýshylarǵa jaza taǵaıyndaǵan. Máselen, tártip saqshysy para alǵany úshin áriptesteriniń aldynda sotty bolǵan edi.
