Sýdıa men advokat sot otyrysy kezinde jaǵa jyrtysty - VIDEO
ALMATY. QazAqparat - AQSh-tyń Florıda shtatynda sot otyrysy kezinde advokat pen sýdıa ózara jaǵa jyrtysyp qaldy. Bul týraly Metro habarlady.
Zańgerler arasyndaǵy daý-janjal beınebaqylaý kamerasyna túsip qalǵan.
Kameradaǵy beınetaspaǵa sáıkes, qorǵaýshy Endrıý Vaınshtok minberde sóılep turǵan kýágerdiń sózin toqtatýǵa tyrysqan. Advokattyń bul qylyǵyn jarata qoımaǵan sýdıa Djon Merfı ashýǵa býlyǵyp: «Qolymda tas bolsa, sizge oılanbastan laqtyrar edim. Ashýyma tımeı, ornyńyzǵa otyryńyz»,- dep eskertken.
Mundaı shabýyldy kútpegen qorǵaýshy Vaınshtok: «Men memlekettik quqyqqorǵaýshy bolǵan soń, osy jerde turýǵa quqyǵym bar», - degen.
Sýdıa Merfı: «Olaı bolsa, syrtta sóıleseıik», - deıdi.
«Jigittershe sóılesýdi uıǵarǵan» ekeýi bir-birine qol jumsap, jaǵa jyrtysýǵa deıin barǵan. Atalǵan oqıǵa týraly Florıda shtatynyń advokattar alqasy da qulaqtandy. Endigi kezekte qyzbalyǵy úshin advokat ta, sýdıa da jaýap beretin bolady.
Aıta keterligi, olardyń janjaly Youtube-ta 90 myń qaralym jınap úlgerdi.
