Sýdıa laýazymyna qoıylatyn talaptardy kúsheıtý qajet - Memleket basshysy
ASTANA. Qarashanyń 18-i. QazAqparat /Aıdar Ospanalıev/ - Elimizdiń azamattarynyń sot júıesine degen senimin arttyrý maqsatyndaǵy barlyq sharalardy júzege asyrý qajet.
Ol úshin sot korpýsynyń kásiptik deńgeıin udaıy jetildirip, sýdıalar men osy laýazymǵa kandıdat azamattarǵa qyzmet sapasy boıynsha qoıylatyn talaptardy kúsheıtý qajet. Bul týraly búgin Elbasy Nursultan Nazarbaev Astanada ótip jatqan Qazaqstan Respýblıkasy sýdıalarynyń V sezinde málim etti, dep habarlaıdy QazAqparat.
Memleket basshysynyń sózine qaraǵanda, elde sýdıa laýazymyna qoıylatyn talaptardyń arnaıy krıterılerin bekitý qajet. Oǵan mindetti túrde kásiptik biliktilik pen moraldyq etıkalyq normalar engizilýi tıis. Sýdıa laýazymyna taǵaıyndalatyn kandıdattardy usynýshy laýazym ıeleri sol kandıdattardyń áreketteri boıynsha jaýapkershilikti óz moıyndaryna alýlary kerek. «Árıne, bul máseleni áli zertteý qajet bolar. Degenmen, oǵan qatysty naqty sharalardy osy kezden bastap-aq júzege asyra bergen durys. Sýdıa laýazymyna taǵaıyndalatyn azamattardy anyqtaýdy jasyryn daýys berý arqyly da júzege asyrý ońdy bolar edi. Bul baǵytta túrli tájirıbeler bar. Qoryta aıtqanda, sýdıa óziniń biliktiligimen, aqyl-oı parasatymen jáne syrtqy keskin-kelbetimen zańnyń ústemdigi men ádilettilikti qamtamasyz etýi tıis», dedi Prezıdent.
Sonymen qatar, Elbasy sot óndiris qysqartý máselesine den qoıyp, sot sheshimderi men ondaǵy túsiniksiz dúnıelerdiń oryn alýynyń aldyn alatyn barlyq múmkindikterdi qarastyrý qajettigin aıtty. «Sottaǵy daýlardyń da sanyn qysqartyp, olardy sheshýdiń balamaly joldaryn qarastyrý qajet», dep atap kórsetti N.Nazarbaev.
