Sýdıa QazATÝ-dyń stýdentin aıamady
ASTANA. QazAqparat - Búgin Qazaq ulttyq óner ýnıversıtetinde ákimshilik quqyq buzýshylyq áreketteri boıynsha kóshpeli sot otyrysy ótti. Onda qoǵamdyq jerde temeki tuqylyn tastaǵan stýdentterdiń de isi qaraldy, dep habarlaıdy QazAqparat tilshisi.
Májilis zalyna aldymen jumys jasyndaǵy azamattardy bir-birlep kirgizip, qorshaǵan ortany lastap, temeki tuqylyn tastaǵany úshin úkim shyǵardy. Osylaısha, Ivan Shvetsov, Qaınar Shotpanov, Valentın Ojogın men Nurlan Ermaǵambetovke 10 AEK, ıaǵnı 22 690 teńge kóleminde aıyppul salyndy. Al Danabek Káribaı men Nurjaýǵan Qaıyrgeldınge jeńildik jasaldy. Olar óz kinásin moıyndap, stýdent ekenderin jetkizdi. Alaıda qaı joǵary oqý ornynda bilim alyp jatqandaryn jarııalamaýdy jón kórdi. Sýdıa Uldana Súleımenova olarǵa qatysty aıyppuldyń kólemin 30 paıyzǵa - 15 883 teńgege deıin qysqartýǵa sheshim shyǵardy. Stýdent Rýstem Maqtaev bolsa, qaı jerde oqyp jatqanyn ashyq aıtyp, kinásin moıyndasa da, sýdıa oǵan qatysty jazany jeńildetken joq. Sol qalpynda, ıaǵnı 22 690 myń teńge kóleminde qaldyrdy. QazAqparat tilshisine suxbat bergen sýdıa Uldana Súleımenova osy sheshimniń sebebi túsindirip berdi.
"Qazaq agrotexnıkalyq ýnıversıtetinde biz osyndaı kóshpeli sot otyrystaryn jıi ótkizip turamyz. Sondyqtan ol joǵary oqý ornynyń stýdentteri temeki tuqylyn tastaý sııaqty quqyq buzýshylyqtyń jazasy jaıynda jaqsy biledi. Maqtaev ózi de aıtyp tur, bizge kelip turatynyńyzdy jáne ondaı jaýapkershilikti bar ekenin bilemin dep, ıaǵnı ol osyndaı sot májilisterinen qorytyndy jasamaı, quqyq buzýshylyqqa baryp otyr. Sol sebepti men oǵan qatysty aıyppuldyń kólemin 30 paıyzǵa tómendetý sharasyn qoldanǵan joqpyn", - dedi Súleımenova.
Aıta keteıik, sýdıa qurylysta jumys isteıtin Almas Ǵabıdenovtiń aıyppulyn da qysqartýdy jón kórdi. Al qoǵamdyq jerlerde alkogol ishken Roman Semenov pen Anatolıı Svıagın eki táýlikke qamaýǵa alyndy.
