Sýburqaqtarda balalardyń shomylýyna ruqsat etilmeıdi
ASTANA. 15 shilde. QazAqparat - Sýburqaqtar qalanyń sánin keltirip, aýany jaqsartyp qana qoımaı, balalardyń shomylý ornyna aınalǵan. Alaıda, mamandar sýǵa kúmp bermes buryn sýdyń sanıtarlyq normalarǵa saı kelýin teksergen jón ekenin alǵa tartýda.
Óıtkeni, demalys ornyna aınalǵan sýburqaqtar túrli juqpaly aýrýlardy týdyrýy múmkin.
«Astanadaǵy sýburqaqtardy árdaıym zerthanalyq tekserýden ótkizip, mıkrobıologııalyq kórsetkishterin anyqtap, tyrysqaq aýrýyn qozdyrý sebebin qadaǵalap otyramyz. Tekserý nátıjesi boıynsha sý temperatýrasy talaptarǵa saı keledi. Alaıda, ol jaǵajaı ne arnaıy shomylatyn oryn bolmaǵandyqtan, sýǵa túsýge tyıym salynady. Soǵan qaramastan, ata-analar balalarynyń sýburqaq sýyna túsýine ruqsat beredi. Ol durys emes.», -deıdi QR DSM Memlekettik sanıtarlyq-epıdemıologııalyq qadaǵalaý komıtetiniń Astana boıynsha departamenti dırektorynyń orynbasary Fedor Peev.
Sýburqaqtardy paıdalaný, baqylaý jasaý qalanyń Sanıtarlyq epıdemıologııalyq qadaǵalaý komıtetine qarasty departamenttiń quzyrynda. Olar sýburqaqtaǵy sýǵa zerthanalyq zertteý jasaıdy. Elordanyń resmı saıtynyń jazýynsha, búginde Astanada qala sáýletine aınalǵan ártúrli bıiktiktegi, ár túrli tústermen bezendirilgen 33 sýburqaq kesheni jumys isteıdi.
