Sýburqaqtar Almaty qalasynyń ekologııalyq ahýalyn jaqsartýǵa óte úlken yqpal etedi - Altaı Rahymbetov
ALMATY. Maýsymnyń 16-sy. QazAqparat /Názıra Eleýhan/- Sýburqaqtar Almaty qalasynyń ekologııalyq ahýalyn jaqsartýǵa óte úlken yqpal etedi. 2009 jyly Jol kartasy baǵdarlamasy boıynsha 13 sýburqaq qaıta jóndeýden ótti.
Jalpy qalada 120 sýburqaq ornalasqan, onyń 45-i kommýnaldyq menshikte. Bul týraly búgin Almatyda jýrnalısterge arnalǵan press-týr barysynda Almaty qalasynyń tabıǵı resýrstar jáne tabıǵatty paıdalanýdy retteý basqarmasy bastyǵynyń orynbasary Altaı Rahymbetov málim etti, dep habarlaıdy QazAqparat.
"Sýburqaqtardy qaıta jóndeýden ótkizý barysynda búgingi zamanǵy tehnologııalar qoldanyldy. Onyń biri Abaı atyndaǵy opera jáne balet teatrynyń aldynda ornalasqan. Onyń 15 túrli qyzmet jumysy bar, túngi jaryq túsirýde 200 sýasty jaryq beretin quraldar qoldanylady, al dybystyq mýzyka avtomatty túrde iske qosylady. Onyń jumysyna 161 sorǵy qoldanylady. Ol tek sýdy únemdep qana qoımaı, elektr qýatyn da únemdeıdi. Bıylǵy jyly biz taǵy bir- eki sýburqaqty qaıta jóndeýden ótkizemiz. Al, búgingi kúni Almatydaǵy barlyq jańa nysandar men ǵımarattardyń aldynda mindetti túrde úlken bolmasa da, kishigirim sýburqaqtar bar ", dep atap ótti Altaı Rahymbetov.
Onyń aıtýynsha, Almaty qalasynda qorshaǵan ortanyń zalaldanýyn tómendetý jáne ekologııalyq ahýaldy jaqsartýda jasyl jelekter úlken ról atqarady. «Bıylǵy jyly «Almaty - Gúl qala» atty jylsaıynǵy festıvaldi ótkizý týraly sheshim qabyldandy. Osy sharaǵa oraı, bıylǵy maýsymda 103 myń sharshy metr orynǵa gúl egildi. Kóktemde 10 myń kóshet otyrǵyzyldy, al kúzde taǵy 15 myń ár túrli kóshet otyrǵyzylatyn bolady. Kóshelerdi ásemdeý, gúlmen kómkerý, úılerdiń qasbetterin bezendirý men kógaldandyrýda ár túrli ósimdikter, landshafttyq sheshimder men arhıtektýralyq formalar paıdalanylýda», dep atap ótti ol.
Onyń aıtýynsha, qazirgi ýaqytta Almaty qalasynyń tabıǵı resýrstar jáne tabıǵatty paıdalanýdy retteý basqarmasy «2009-2018 jyldarǵa arnalǵan Almaty qalasynda qorshaǵan ortanyń zalaldanýyn tómendetý» maqsatynda jasalǵan keshendi baǵdarlamasy aıasynda «Almaty páter qyzmeti» MKQ -men birlesip tájirıbeden ótken, jer astyna ornalastyrylatyn konteınerler qoıý jónindegi ilki jobany júzege asyrýda.
