Sýburqaqqa shomylý qaýipti – maman
ORAL. KAZINFORM — Batys Qazaqstan oblysynda barlyǵy 35 sýburqaq ornalasqan.
BQO sanıtarııalyq-epıdemıologııalyq baqylaý departamentiniń baspasóz mamany Kenjegúl Muhıtovanyń málim etkenindeı, kúni búginge deıin sonyń 11-i iske qosyldy.
Onyń sózine qaraǵanda, eki sýburqaqta jóndeý jumystary júrgizilip jatyr, úsheýi jumys jasamaıdy. Qalǵan 19 sýburqaqty bıylǵy 1 maýsymǵa deıin iske qosý josparlanyp otyr.
Jyl saıyn mamyr-qyrkúıek aılary aralyǵynda sýburqaq sýlaryna sanıtarııalyq-epıdemıologııalyq monıtorıng júrgizilip, vırýsologııalyq zertteýler úshin sý synamalary alynady.
Departament deregine sáıkes ótken jyldyń qorytyndysy boıynsha sýburqaq sýlary vırýsty A gepatıti, rotovırýs jáne enterovırýs kórsetkishterine zerttelip, barlyq synamalardan oń nátıje anyqtalǵan joq.
Jaz mezgilinde sýburqaqtar turǵyndardyń, ásirese, balalardyń kóp jınalatyn ornyna aınalady. Keıbir turǵyndar sýburqaq mańynda serýendep qana qoımaı, onyń sýyna shomylady. Alaıda sýburqaqtar shomylýǵa arnalmaǵanyn eskergen jón.
- Sýburqaq sýynda shomylý jiti ishek ınfektsııalarynyń, respıratorlyq aýrýlardyń taralýyna sebep bolýy múmkin. Ásirese, enterovırýstyq jáne rotovırýstyq ınfektsııalar, vırýsty A gepatıti sekildi aýrýlardy juqtyrý qaýpi joǵary. Sonymen qatar parazıttik jáne ózge de juqpaly aýrýlardyń taralý qaýpi bar, - deıdi K.Muhıtova.
Mamannyń aıtýynsha, sýburqaqtaǵy sý jıi jańartylmaıdy. Oǵan qosa, sýburqaqtarǵa qustar men qańǵybas janýarlar túsip, túrli ınfektsııa qozdyrǵyshtaryn taratýy yqtımal. Al jazdyń ystyq kúnderinde sýdaǵy mıkroorganızmder óte jyldam kóbeıedi.
- Batys Qazaqstan oblysynyń sanıtarııalyq-epıdemıologııalyq baqylaý departamenti turǵyndardy saqtyq sharalaryn saqtaýǵa, sýburqaqtarda shomylýdan bas tartýǵa jáne ózderi men jaqyndaryn ınfektsııalyq aýrýlardan qorǵaýǵa shaqyrady. Ásirese, ata-analar balalarǵa sýburqaqtarda shomylýdyń qaýipti ekenin túsindirip, olardyń qaýipsizdigine muqııat qaraýy qajet, - dep qosty K.Muhıtova.
Oblysta jyl basynan beri 175 adam jiti ishek ınfektsııalarymen syrqattandy, bul ótken jylǵy osy kezdegiden (169) 3,55 paıyzǵa kóp. Sonyń ishinde 132-si – 14 jasqa deıingi balalar.
Bıyl 1 dızenterııa juqpasy tirkelip, ótken jylǵydan (8) edáýir tómendedi.
Sol sekildi salmonellez 2,92 esege (2025 jylǵy tórt aıda – 35, 2026 jyly – 12, munyń 8-i – balalar) azaıdy.
Eske sala keteıik, budan buryn Batys Qazaqstanda 140-tan astam adamnyń jiti ishek juqpalarymen aýyrǵanyn jazǵan edik.
