Sýburqaq koronavırýstyń taralý qaýpin týdyrdy
ALMATY. QazAqparat- Almatynyń memlekettik bas sanıtar dárigeri Jandarbek Bekshın onlaın brıfıng barysynda sýburqaqtarda adam kóp jınalǵandyqtan, koronavırýs ınfektsııasyn juqtyrý yqtımaldyǵy joǵary ekenin aıtty, dep habarlaıdy QazAqparat tilshisi.
Onyń aıtýynsha, sýburqaqtar arqyly tek koronavırýsty ǵana emes, basqa da aýrýlardy juqtyrýǵa bolady. Sýburqaqtarda shomylý saldarynan qalada parazıttik aýrýlardyń órshýi tirkelgen.
«Sýburqaqtarda shomylý adamdardyń densaýlyǵyna zııan. Tuman tárizdi áseri bar sýburqaqtar erekshe qaýip tóndiredi. Pandemııa kezinde olardyń jumysy toqtatylady», - dedi Jandarbek Bekshın.
Sonymen qatar, ol qaladaǵy sýburqaqtar janyna shomylýǵa tyıym salatyn belgiler ornatylatynyn tilge tıek etti.
Sanıtar dárigerler de, jergilikti atqarýshy organdar da sýburqaqtardy baqylaýǵa almaq.
Máselen, Almatydaǵy Dostyq pen Qurmanǵazy kósheleriniń qıylysyndaǵy jeke tuman tárizdi fontan adamdardyń kóp jınalýyna baılanysty jabyldy.
Buǵan deıin, ol saıabaqtarǵa, adam kóp jınalatyn oryndarǵa, bazarlardyń kireberisterine betperde rejımin baqylaý kúsheıtilgenin, ol jerlerge betperdesiz kirýge bolmaıtynyn aıtqan bolatyn.