Sýbsıdııany elektrondy túrde berý jumysy qalaı júrip jatyr

ASTANA. QazAqparat - QR Aýyl sharýashylyǵy vıtse-mınıstri Arman Evnıev agroónerkásip salasyndaǵy sýbsıdııany elektrondy túrde berý sharalary týraly aıtyp berdi, dep xabarlaıdy QazAqparat tilshisi.

Onyń aıtýynsha, búginde osy salada sýbsıdııanyń 14 túri bar. Bıyl tyńaıtqyshtar boıynsha sýbsıdııa berý sharalary tolyǵymen avtomatty júıege kóshirildi.

«Osy baǵytta 18,2 mlrd teńgeniń 20 myń ótinimi elektrondy túrde berildi. Osy ýaqytqa deıin 17,1 mlrd teńge ónim óndirýshilerge aýdaryldy. Barlyq málimetter avtomatty túrde tekserildi. Al ótinimdi qaraý merzimi - bir kún. Jaqyn arada ósimdik sharýashylyǵy, janar-jaǵarmaı jáne taǵy basqa salalarǵa jatatyn sýbsıdııalardy avtomattandyrý josparlanǵan», - dedi A.Evnıev Astanada ótken baspasóz máslıxatynda.

Vıtse-mınıstrdiń sózine qaraǵanda, jyl sońyna deıin qalǵan sýbsıdııalardy avtomattandyrý sharalary aıaqtalsa, ótinimderdi qaraý merzimi 2,5 ese - 18 kúnnen bir aptaǵa deıin qysqarady. Al, eń bastysy, osy saladaǵy sybaılas jemqorlyq áreketteri azaıady. Sebebi, tsıfrlandyrýdyń nátıjesinde sýbsıdııa taratatyn komıssııalardyń jumysy toqtaıdy. Budan bólek, sýbsıdııany beretin jáne alatyn adamnyń jeke jaýapkershiligi artady. Óıtkeni árqaısysy elektrondy tsıfrlyq qoltańbany paıdalanyp otyrǵanda, elektrondy júıede bári aıdan anyq kórinip turady.

«Fermerdiń ózi reestrge túsken ótinishtiń qalaı qaralyp jatqanyn jáne oǵan qatysty sheshimniń qashan qabyldanatynyn baqylaı alady. Sosyn elektrondy júıe qaǵazbasty jumystan qutylýǵa múmkindik berip otyr. Qujat jınaýdyń qajeti joq. Memlekettik organdar arasyndaǵy qaǵaz aınalymy da tómendeıdi», - dep atap kórsetti A.Evnıev.