Sýbsıdııanyń ornyna jeńildetilgen nesıe: sharýalar úshin ne ózgerdi
ASTANA. KAZINFORM — 2026 jyldan bastap mal sharýashylyǵyn memlekettik qoldaý júıesinde birqatar mańyzdy ózgeris engizildi. Endi elimizde sýbsıdııalardan kezeń-kezeńmen jeńildetilgen kredıtteý men lızıngke kóshý qolǵa alynyp jatyr.
Aýyl sharýashylyǵy mınıstrliginiń málimetinshe, fermerler men kásipkerler 5% jeńildetilgen nesıe nemese lızıng arqyly kóktemgi egin egý, egin jınaý, aýyl sharýashylyǵy tehnıkasyn alý, qaıta óńdeý zaýyttarynyń jumysyn qarjylandyrý, sondaı-aq mal bordaqylaý alańdary men usaq mal satyp alý jumystaryn júrgize alady.
— Atalǵan quraldar AÓK sýbektilerine sýbsıdııalar alý qajettiliginsiz birden 5% syıaqy mólsherlemesi boıynsha kredıtter, lızıng alýǵa múmkindik beredi. Jeńildikti kredıtteý jáne lızıng baǵdarlamalarynyń 5%-ben iske qosylýyna baılanysty kredıt jáne lızıng kezinde syıaqy mólsherlemelerin sýbsıdııalaý baǵdarlamasynan aınalym qarajatyn tolyqtyrýǵa arnalǵan qaryz boıynsha syıaqy mólsherlemelerin sýbsıdııalaý, sondaı-aq rezervke (kútý paraǵyna) sýbsıdııalaýǵa usynystar qabyldaý alynyp tastaldy, — dedi mınıstrlik ókilderi Kazinform tilshisiniń resmı saýalyna bergen jaýabynda.
Sonymen qatar, ınvestıtsııa salýǵa arnalǵan kredıtterdiń paıyzdyq tólemin memleket sýbsıdııalaıdy. Bul fermerler men kásipkerlerdi óz bıznesine aqsha salýǵa yntalandyrady ári salada nesıe alý múmkindigin arttyrady.
Asyl tuqymdy mal sharýashylyǵyn qoldaý jáne mal ónimderiniń sapasy men ónimdiligin arttyrý baǵyttary:
1. Asyl tuqymdy mal sharýashylyǵyn damytý:
— Asyl tuqymdy mal men qusty, sondaı-aq embrıondar men buqalardyń uryǵyn satyp alý;
— Asyl tuqymdyq ortalyqtar men dıstrıbıýtorlyq ortalyqtardyń kórsetetin qyzmetterin (iri qara mal men qoılardy qoldan uryqtandyrý) qarjylandyrý;
— Minetin jáne jegiletin jylqylardyń otandyq tuqymdarynyń asyl tuqymdy analyǵymen selektsııalyq jumystar júrgizý.
2. Mal sharýashylyǵy ónimderiniń óndiris shyǵyndaryn arzandatý:
— Buqashyqtar men qoshqarlardy bordaqylaý alańdaryna nemese et óńdeýshi kásiporyndarǵa ótkizý;
— Sıyr, bıe jáne túıe sútin óndirý shyǵyndaryn tómendetý;
— Taýyq etin óndirý qunyn azaıtý;
— Bııazy jáne jartylaı bııazy júndi qaıta óńdeýge ótkizý shyǵyndaryn tómendetý;
— Bal óndirisiniń shyǵyndaryn azaıtý;
— Maldyń azyǵyna ketken shyǵyndardy sýbsıdııalaý.
Sýbsıdııany kimder ala alady?
— Aýyl sharýashylyǵy ónimin óndiretin jeke nemese zańdy tulǵalar.
— Asyl tuqymdy mal ósirýmen aınalysatyn, olardy kóbeıtetin jáne saqtaıtyn jeke nemese zańdy tulǵalar.
— Asyl tuqymdyq ortalyqtar, dıstrıbıýtorlyq ortalyqtar jáne uryqtandyrýshy-tehnıkter — analyq maldy qoldan uryqtandyrý boıynsha qyzmet kórsetetin uıymdar.
— 2026 jyly sýbsıdııalar kólemi shamamen 119,3 mlrd teńge deńgeıinde josparlanyp otyr. Degenmen basty maqsat — tikeleı sýbsıdııadan jeńildetilgen nesıeleýge kezeń-kezeńmen kóshý, — dep atap ótti mınıstrlik.
Aıta keteıik, Qostanaı oblysynda balyq pıtomnıkterine zańsyz tólengen sýbsıdııalar óndirildi.