Sýbsıdııanyń keshigýi men qarjy tapshylyǵy: Óskemende tamaq ónerkásibiniń túıtkilderi talqylandy
ÓSKEMEN. KAZINFORM — Óndiris shyǵyndarynyń ósýi, sýbsıdııalardyń ýaqtyly tólenbeýi jáne jeńildetilgen nesıege qoljetimdilik máseleleri otandyq tamaq ónerkásibiniń damýyna áser etip otyr. Shyǵys Qazaqstanǵa kelgen Quryltaı depýtattary óńirdegi kásiporyndardyń jumysymen tanysyp, salanyń ózekti máselelerin talqylady.
22-23 qazanda Quryltaıdyń Ekonomıkalyq saıasat, ónerkásip jáne energetıka komıtetiniń depýtattary «Shyǵys-Sút» korporatsııasy men Altai Mai zaýytyn, sondaı-aq Ulan aýdanyndaǵy «Ýkraınka» sharýa qojalyǵynyń taýarly fermasyn aralady. Sapardyń maqsaty — otandyq tamaq ónerkásibin qoldaý máselelerin zerdelep, kásiporyndardyń aldynda turǵan kedergilerdi anyqtaý.
Kásiporyndardyń jumysymen tanysý barysynda kóterilgen máseleler kóshpeli otyrysta talqylandy. Quryltaı depýtaty Vadım Basın óndiris shyǵyndarynyń ósýi, sýbsıdııalardyń keshigýi jáne kásiporyndardyń óndiristik qýattaryn tolyq paıdalana almaýy salanyń damýyna kedergi keltiretinin atap ótti.
Memlekettik qoldaý tetikteriniń ózgerýi de óndirýshiler úshin mańyzdy másele bolyp otyr. «Atameken» ulttyq kásipkerler palatasynyń ókili Aslan Qalıǵazın taýarlyq-spetsıfıkalyq sýbsıdııalardan jeńildetilgen nesıe berýge kóshý máselesin kóterdi. Onyń aıtýynsha, qoldaý tetikterindegi ózgerister otandyq óndirýshilerdiń jumysyna áser etýi múmkin.
Qarjylandyrý máselesi kásiporyndardy jańǵyrtý jáne aýyl sharýashylyǵy shıkizatyn tereń óńdeý múmkindikterimen de baılanysty. Óndiristi damytý úshin kásiporyndarǵa qoljetimdi qarjy qajet bolsa, daıyn ónimniń básekege qabilettiligin arttyrý úshin sapany jaqsartyp, ótkizý naryqtaryn keńeıtý mańyzdy. Osy baǵyttar boıynsha Aýyl sharýashylyǵy jáne Saýda jáne ıntegratsııa mınıstrlikteriniń ókilderi memlekettik qoldaý sharalary týraly aqparat berdi. Kásiporyn basshylary da óndiristegi túıtkilder men olardy sheshýge qatysty usynystaryn jetkizdi.
Shyǵys Qazaqstan oblysy ákiminiń orynbasary Renat Qurmambaev óńirdiń tamaq ónerkásibindegi áleýetine toqtaldy. Onyń aıtýynsha, bıyl oblys tamaq ónimderin óndirý kólemi boıynsha respýblıkada besinshi orynda, al ósimdik maıyn óndirýden birinshi orynda tur.
— Shyǵys Qazaqstan — elimizdegi azyq-túlik ónimderin óndiretin jetekshi óńirlerdiń biri. Óndiristik qýattardy damytý eksporttyq naryqtardy keńeıtýge múmkindik berdi. Bizdiń basty mindetimiz — kásiporyndardy jańǵyrtý, ónimdi tereń óńdeý, sapasyn arttyrý jáne ótkizý naryqtaryn keńeıtý, — dedi Renat Qurmambaev.
Óńirdiń óndiristik áleýetin odan ári damytý úshin kásiporyndardyń qarjyǵa qoljetimdiligin arttyrýmen qatar, daıyn ónimdi ishki jáne syrtqy naryqtarda ótkizý múmkindikterin keńeıtý qajet. Bul máselelerdi sheshý otandyq óndirýshilerdiń básekege qabilettiligin arttyrýǵa jáne eksporttyq baǵyttardy damytýǵa yqpal etedi.
Otyrysty qorytyndylaǵan Komıtet tóraǵasy Natalıa Godýnova memlekettik organdar, depýtattar men bıznes ókilderiniń birlesip jumys isteýiniń mańyzyn atap ótti.
Jıyn qorytyndysy boıynsha memlekettik qoldaý tetikterin jetildirý, jeńildetilgen qarjylandyrýǵa qoljetimdilikti arttyrý, otandyq shıkizatty óńdeýdi yntalandyrý jáne daıyn ónimdi ótkizý naryqtaryn keńeıtý jóninde usynystar ázirlendi. Olar Qazaqstan Úkimetine joldanyp, zańnamany jetildirý barysynda eskeriledi.
Eske salsaq, buǵan deıin Quryltaı otyrysynda apattyq jaǵdaıdaǵy úıler men tozyǵy jetken kópirler máseleleri kóterilgenin jazǵanbyz.
