Sýbsıdııany qaıtarý daýy: Túrkistan oblysynda 1000-nan astam is qaralyp jatyr
TÚRKІSTAN. KAZINFORM — Aýyl sharýashylyǵy sýbsıdııalaryn qaıtarý daýy óńirde áli de ózekti. Bul másele baqylaýdyń ýaqytyly júrgizilmeýinen týyndaǵan.
Túrkistan oblysy Kásipkerler palatasynyń málimetinshe, qazirgi tańda oblys sottarynda memleketten berilgen sýbsıdııalardy qaıtarýǵa qatysty 1000-nan astam azamattyq is qaralyp jatyr.
Taldaý nátıjeleri kórsetkendeı, negizgi túıtkil — Aýyl sharýashylyǵy mınıstriniń 2019 jylǵy buıryǵynda kózdelgen talaptardyń tıisti deńgeıde oryndalmaýy.
— Atap aıtqanda, aýdandyq aýyl sharýashylyǵy bólimderi sýbsıdııalanǵan mal basynyń saqtalýyna toqsan saıyn monıtorıng júrgizýge mindetti bolǵanymen, bul talap tolyq oryndalmaǵan. Sonyń saldarynan kásipkerler birneshe jyldan keıin ǵana «mindettemeni buzdy» degen negizde sotqa tartylyp otyr, — delingen vedomstvo taratqan aqparatta.
Keı jaǵdaılarda monıtorıng tek prokýratýranyń usynysynan keıin júrgizilgen. Al birqatar iste memlekettik organdar kásipkerler usynǵan dálelderdi tolyq zerdelemeı, sotqa talap-aryz bergen.
— Máselen, Keles aýdanynda 2021-2024 jyldary 227 mln teńgeden astam sýbsıdııa berilip, onyń 103 mln teńgeden astamy qaıtarýǵa jatqyzylǵan. Alaıda bul sheshimderdiń bir bóligi jetkilikti tekserýsiz qabyldanǵan. Tipti derekterge sáıkes kelgen jaǵdaılardyń ózinde kásipkerler sot daýyna tartylǵan, — delingen resmı aqparatta.
Túrkistan oblysy Kásipkerler palatasynyń jetekshi sarapshysy Serjan Sartbaev memlekettik organdar tarapynan birqatar olqylyq jiberilgenin atap ótti.
— Bizdiń taldaýymyz kórsetkendeı, keıbir jaǵdaılarda monıtorıng ýaqytynda júrgizilmegen, al kásipkerlerdiń derekteri tolyq tekserilmeı, sotqa talap aryzdar joldanǵan. Bul kásipkerlerdi negizsiz daýlarǵa tartyp, olardyń jumysyna kedergi keltirip otyr, — dedi ol.
Sondaı-aq taldaý barysynda birqatar aýdandyq prokýratýra men aýyl sharýashylyǵy bólimderi resmı suranystarǵa ýaqtyly jaýap bermegeni anyqtalǵan. Qoldanystaǵy zańnamaǵa sáıkes, mundaı suranystarǵa 15-30 jumys kúni ishinde jaýap berilýi tıis. Alaıda aqparattyń tolyq usynylmaýy máseleni jan-jaqty zerdeleýge kedergi keltirgen.
Budan buryn Túrkistan oblysynda 20 mln teńge sýbsıdııany zańsyz alǵan kooperatıv basshysy sottalǵanyn jazǵan edik.
